Eki el delegasııalarynyń qatysýymen ótken kelissóz barysynda Prezıdent ózara yqpaldastyqty odan ári nyǵaıtýdyń áleýeti mol ekenine toqtaldy, dep jazady Egemen.kz Aqordanyń baspasóz qyzmetine silteme jasap.
«Ekijaqty saıası yntymaqtastyq pen ekonomıkalyq qarym-qatynastyń bolashaǵy zor dep sanaımyn. BUU, EQYU jáne basqa da halyqaralyq uıymdar aıasyndaǵy mıssııalarymyz tyǵyz jumys istep, dıalogty turaqty túrde saqtap keledi. Kóptegen baǵyt boıynsha baılanystarymyzdy damytýǵa múmkindik jetkilikti», dedi Memleket basshysy.
Qasym-Jomart Toqaev Chehııanyń syndarly ári pragmatıkalyq syrtqy saıasatyna joǵary baǵa berdi. Prezıdenttiń aıtýynsha, eki el arasyndaǵy saıası dıalog san qyrly seriktestikke qolaıly jaǵdaı jasaıdy. Parlamentaralyq yqpaldastyq qarqyndy damyp keledi.
Memleket basshysy Chehııa Qazaqstannyń Eýropa Odaǵyndaǵy negizgi saýda seriktesteriniń biri ekenine nazar aýdardy.
«Taýar aınalymynyń dınamıkasy kóńil kónshiterlikteı. Árıne, biz aldaǵy ýaqytta da saýda-ekonomıkalyq baılanystardy keńeıtýge nıettimiz. Búginde elimizde 190-nan astam cheh kompanııasy jumys istep jatyr, sonyń ishinde Škoda, Omnipol, Tatra jáne ZVVZ sekildi mańdaıaldy kásiporyndar men basqa da óndiris salasyndaǵy senimdi áriptesterimiz bar. Birlesken jobalardy júzege asyrýǵa múmkindik mol», dedi Qasym-Jomart Toqaev.
Qasym-Jomart Toqaev pen Andreı Babısh shaǵyn quramda kelissóz júrgizdi
О́z kezeginde Andreı Babısh búgingi sapar ekijaqty qarym-qatynastyń jańa kezeńine jol ashatynyn aıtty.
«Biz Qazaqstandy strategııalyq seriktes sanaımyz. Birlesken kúsh-jigerdiń arqasynda ekijaqty taýar aınalymynyń kólemin arttyramyz dep senemin. Eń aldymen, energetıka salasyndaǵy yqpaldastyqty nyǵaıtqymyz keledi. Sizdiń elden uzaq merzimdi munaı tasymalyna múddelimiz. Energetıka salasyn damytý strategııamyz atom energııasyna arqa súıeıdi. Sondyqtan Qazaqstanǵa álemdegi ýran óndiretin iri memleket retinde de qyzyǵýshylyq tanytamyz», dedi Chehııa Premer-mınıstri.
Cheh Úkimetiniń basshysy Qazaqstannyń energetıkalyq qaýipsizdigi qýat óndirýdiń ártaraptandyrylǵan tásiline negizdelgenine mán berdi. Sondaı-aq ol cheh kompanııalarynyń atalǵan salada birlesken jobalardy júzege asyrýǵa daıyn ekenin rastady.
Andreı Babısh Qasym-Jomart Toqaevty jańa Konstıtýsııa qabyldaý boıynsha referendýmnyń tabysty ótýimen quttyqtap, buǵan memlekettilikti nyǵaıtatyn jáne eldi jarqyn bolashaqqa jeteleıtin mańyzdy qadam retinde baǵa berdi.
Qasym-Jomart Toqaev pen Andreı Babısh ónerkásip, munaı-gaz, atom energııasy, kólik-logıstıka, qorǵanys ónerkásibi, sıfrlandyrý, aýyl sharýashylyǵy jáne densaýlyq saqtaý salalaryndaǵy ózara yntymaqtastyq perspektıvalaryn talqylady.
Prezıdent Aqordada Cheh Respýblıkasynyń Premer-mınıstrin qarsy aldy
Áńgimelesý barysynda eki el arasyndaǵy qarym-qatynas tek ekonomıkamen shektelmeıtini, ortaq tarıhı oqıǵalar men mádenı-gýmanıtarlyq baılanystarǵa negizdeletini jaıynda aıtyldy.
Memleket basshysy qazaq dalasyna Prjevalskıı jylqylaryn qaıta jersindirýdi kózdeıtin biregeı jobaǵa atsalysqany úshin chehııalyq áriptesterine rızashylyǵyn bildirdi. Prezıdent О́ńirlik ekologııalyq sammıtte bul bastamany elimizdiń bıoalýantúrlilikti saqtaý salasynda jetken jetistikteriniń biri retinde ataǵan bolatyn.
Premer-mınıstr Qazaqstan azamattaryna vıza rejımin jeńildetý máselesine Chehııanyń ekijaqty deńgeıde jáne Eýropa Odaǵy aıasynda yqpal etýge nıetti ekenin jetkizdi.
Kelissóz qorytyndysy boıynsha taraptar joǵary deńgeıde qol jetkizilgen ýaǵdalastyqtardy naqty iske asyrý úshin jobalar tizimin ázirleıdi.
Andreı Babısh Qasym-Jomart Toqaevty ózine yńǵaıly ýaqytta Chehııaǵa saparmen kelýge shaqyrdy. Memleket basshysy bul usynysty yqylaspen qabyl aldy.