Ýkraına chempıonyn taldyryp túsirdi
Aralas tásilmen shaıqas jekpe-jeginiń sheberi, Reseıdiń Orynbor qalasynyń ókili, qazaq jigiti Damır Ismaǵulov Sankt-Peterbýrgte ótken M-1 Challenge 65 týrnırinde Ýkraına ókili Vıacheslav Tendi aıqyn basymdyqpen jeńdi. Ol jaýyngerlik sambodan óz eliniń chempıony bolǵan sportshyny shaıqastyń birinshi raýndynda-aq iske alǵysyz etip tastady.
Urystan keıin orynborlyq tarlan ózine qoldaý kórsetken qazaqstandyqtarǵa alǵys sezimin jetkizdi. «Men keshe jeńiske jettim. Sol shaıqasqa ózim de uzaq daıyndalǵan edim. Al, men úshin jankúıerlik etetin adamdardyń Qazaqstanda kóp ekeni qýantady. Men bul qoldaýdy jaqsy baǵalaımyn. Aldaǵy ýaqyttarda ózimniń ata-babalarymnyń mekeni – Qazaqstan jerinde de óner kórsetip qalatyn shyǵarmyn dep oılaımyn. Sonda ózimniń bar kúshimdi salyp, jaqsy nátıje kórseter edim», – dedi Damır óziniń sózinde.
Damır Ismaǵulov – aralas jekpe-jektiń Búkilálemdik assosıasııasy Azııa dıvızıony ótkizetin «Kóshpendiler shaıqasy» kásipqoı týrnıriniń birneshe dúrkin jeńimpazy.
Damır QOJAMQUL.