Ulttyq mýzeıde «Máskeý aqsha saraıynyń kúmis markalaryndaǵy Mekke» atty kórme ótti.
«Máskeý aqsha saraıy usynyp otyrǵan kórme eksklıýzıvti kórme bolyp sanalady. Qasıetti Mekkege ǵana emes, jalpy Islam dini mádenıetine jasalǵan úlken qurmettiń belgisi retindegi toptamany jasaý úshin 3 jyl ýaqyt qajet bolǵan. Ondaǵy markalardyń týra qyryq sanyna sáıkestendirilýi kezdeısoq emes. Ardaqty paıǵambarymyzǵa 40 jasynda Alladan ýahı kelgen. Sonymen qatar, 40 sany ózge dinderde de qasıetti bolyp sanalady. Erejep aıy bastalǵanda osy kórmeniń Ulttyq mýzeıde ótip jatqanyna qýanyshtymyz, – dedi kórmeniń ashylý saltanatynda toptamadaǵy markalar ereksheligine toqtalǵan Ulttyq mýzeıdiń dırektory Darhan Myńbaı.
Mádenıet jáne sport mınıstrliginiń jaýapty hatshysy Qýatjan Ýálıev kúmis markalar shekteýli tırajben shyǵarylǵanyn, sondyqtan da az ýaqyt ishinde antıkvarıatqa aınalǵanyn alǵa tarta kelip, qundy jádigerler kórmesi alǵash ret 2013 jyly Tatarstanda ótkenin jáne bul kórkemdigi jaǵynan álemde balamasy joq buıymdardyń usynylymy ekenin aıtty.
Al, «VT» kompanııasynyń dırektory Vladımır Prýsakov osynaý mańyzdy jobany Ulttyq mýzeıde ótkizýge muryndyq bolǵan uıymdastyrýshylarǵa alǵys bildirdi. Sonymen qatar, markalar toptamasyn jasaý ıdeıasy jaıynda áńgimelep berdi. Aıta ketý kerek, «Kúmispen kúptelgen Mekke» atty markalar toptamasyn jasaý ıdeıasy 2006 jyly «Altyn jáne Kúmis Qurandar» jobasyn jalǵastyrý ári ony damytý nıetinde týsa, 2013 jyldan beri túrli dúnıejúzilik, halyqaralyq kórmelerge qatysyp kele jatqany óz aldyna bólek tarıh. Saıyp kelgende, bular ǵasyrlar artefakty bolyp tabylady. Bul jumysqa ǵalymdardan bastap, sarapshylar, tehnologtar, ınjenerler, dızaınerler, músinshiler men sýretshiler tartylǵan.
Qarshyǵa KÚLEN.