QARAǴANDY. 12 sáýir. Qaraǵandy oblysynda ózderin «mınıstrliktenbiz» dep tanystyrǵan jalǵan komıssııa 10 mekteptiń dırektorlarynan aqsha bopsalaǵan. Bul týraly Qaraǵandy oblystyq ishki ister departamentiniń baspasóz qyzmetine silteme jasaǵan egemen.kz tilshisi habarlady.
Jalǵan komıssııanyń jumysy týraly málimet eń aldymen oblystyń Aqbastaý aýylyndaǵy mektep dırektorynan tústi. Ol «102» telefonyna habarlasyp, úsh adamnan turatyn komıssııanyń «kemshilikter tabyla qalsa oǵan kóz jumamyz» dep, 100 myń teńge bopsalaǵanyn habarlaǵan.
Sol kúni júrgizilgen jedel-izdestirý sharalary barysynda tártip saqshylary buryn isti bolǵan 54 jastaǵy áıel men onyń eki sybaılasyn ustady. Tergeý barysynda kúdikti áıel óziniń aram oıyn iske asyrý úshin eki adamdy jaldaǵanyn moıyndady. Sondaı-aq, jalǵan komıssııanyń 10 mektep dırektorlarynan aqsha bopsalaǵany anyqtaldy.
Qazirgi ýaqytta sotqa deıingi tergeý amaldary júrgizilýde.
Qaırat Ábildınov.
Derek: Qaraǵandy oblystyq ishki ister departamentiniń baspasóz qyzmeti.
Foto: news.ykt.ru.