QOSTANAI. 12 sáýir. Qostanaı oblysynda órt qaýipsizdigi aılyǵy 11 sáýirden bastaldy. О́tken jyly oblys óńirindegi orman alqaptarynda 40 órt oqıǵasy tirkelgen. Bul aldyńǵy jylǵa qaraǵanda birjarym esedeı kóp. Bul týraly egemen.kz tilshisi habarlady.
Negizi Tobyl-Torǵaı óńirindegi ormandy alqaptardyń kólemi kóp emes, memlekettik orman qory 455 534 gektar shamasynda ǵana, onyń ishinde taza orman 227 199 gektar bolady. О́tken jyly 4795 gektar aǵash qyzyl jalynnyń qurbany boldy. Bul 2014 jylǵa qaraǵanda edáýir kóp, aldyńǵy jyly 26 órt oqıǵasy bolyp, onda 1171 gektar jer zalaldanǵan edi. Oblys boıynsha orman órtteriniń 70 paıyzy Mıhaılov orman qoryǵyna tıesili. Tabıǵat resýrstary jáne tabıǵatty paıdalaný basqarmasynyń basshysy Ámirhan Maýqulov oblysta jyl saıyn órtke qarsy sharalardyń barlyǵy jasalatynyn aıtty.
Qostanaı oblystyq tabıǵat resýrstary jáne tabıǵatty paıdalaný basqarmasynyń basshysy Ámirhan Maýqulov: «Aǵashty jerlerdiń irgesi 884 shaqyrym jyrtyldy, 48073 shaqyrym órtke qarsy mıneraldanǵan joldar kútiledi. Oblys óńirinde 22 órtke qarsy stansa bar, olardyń barlyǵy qajetti tehnıkamen jaraqtandyrylǵan. Ormandy alqaptardyń jartysyna jýyǵy tik ushaqpen baqylanady», – dedi.
Ormannyń jaýy órt ǵana emes. Aǵashtardy aıamaı kesetin brakonerler de aǵashty alqaptyń qýsyrylýyn tezdetedi. О́tken jyly ormanda ruqsatsyz aǵash kesken 25 adam ustalǵan. Olar 82 tekshe metr aǵash kesken. Olardyń ústinen 14 qylmystyq is sotta qaralǵanymen 11 is qaıtyp alynǵan. Osy oraıda oblys ákimi Arhımed Muhambetov ruqsatsyz aǵash kesetinderdiń jazasyn qataıtýdy usyndy.
Oblys ákimi Arhımed Muhambetov: «Qazirgideı aǵash urlap keskenderdiń benzoarasyn alyp qoıý, usaq aıyppulmen jiberý jetkiliksiz, óte jeńil jaza dep bilemin. Dánigip alǵandar munymen toqtamaıdy, ormanǵa barýyn qoımaıdy. Sondyqtan buqaralyq aqparat quraldary arqyly olardyń tabıǵatqa meıirimsiz qaraıtyndyǵyn, eldiń baılyǵyna qol suqqanyn jurtshylyqqa kórsetý kerek», – dedi.
Názıra Járimbetova.
Derek, foto: egemen.kz.