QARAǴANDY. 12 sáýir. Qaraǵandy oblysy ákiminiń ókimimen Nıqanbaı Imanǵalıuly Omarhanov Nura aýdanynyń ákimi qyzmetine taǵaıyndaldy. Bul týraly Qaraǵandy oblysy ákiminiń baspasóz qyzmetine silteme jasaǵan egemen.kz tilshisi habarlady.
Nıqanbaı Omarhanov 1955 jyly týǵan. 1977 jyly Selınograd aýyl sharýashylyǵy ınstıtýtyn, 2002 jyly Qaraǵandy memlekettik tehnıkalyq ýnıversıtetin támamdaǵan. Biliktiligi boıynsha, aýyl sharýashylyǵynyń ınjener-elektrıgi, ekonomıst.
Onyń sharýashylyq salasynda jáne memlekettik basqarý isinde mol tájirıbesi bar. 20 jyldan astam ýaqyt boıy Qarqaraly aýdanynyń aýyl sharýashylyǵy salasynda túrli qyzmetter atqardy. 2000-2010 jyldary Qarqaraly aýdany ákiminiń orynbasary, ákimi boldy. Qaraǵandy oblysy aýyl sharýashylyǵy basqarmasynyń basshysy, keıin «Agrokonsaltıng» AQ basqarmasynyń tóraǵasy qyzmetterin atqardy. 2013 jyldyń maýsym aıynan búginge deıin Aqtoǵaı aýdanynyń ákimi laýazymynda boldy.
«Eren eńbegi úshin» medalimen nagradtalǵan.
Nura aýdanynyń osyǵan deıin ákimi bolǵan Qudaıbergen Beksultanov Qaraǵandy qalalyq máslıhatynyń hatshysy bolyp saılandy.
Qaırat Ábildınov.
Derek, foto: Qaraǵandy oblysy ákiminiń baspasóz qyzmeti.