Elimizde alǵash ret qyz balalar áskerı mamandyq alyp shyǵady. Osy jyly Qorǵanys mınıstrliginiń bastamasy boıynsha barlyq azamattyq joǵary oqý oryndaryndaǵy áskerı kafedralarda stýdent qyzdarǵa arnalǵan mamandyqtar ashyldy. Áskerı kafedraǵa oqýǵa túsý úshin olar medısınalyq kýálandyrýdan ótip, deneshynyqtyrý daıarlyǵy boıynsha normatıvter men psıhologııalyq testileý tapsyrý qajet. Al barlyq kórsetkishter komıssııa otyrysynda qaralady.
– Áskerı kafedrada bilim bere otyryp, biz qyzdarǵa birden Qarýly Kúshteriniń ofıseri retinde ózin aıqyndaýǵa múmkindik beremiz. Ol úshin Qazaqstandaǵy barlyq joǵary oqý oryndarynan áskerı mamandyq ashtyq. Oqý aıaqtalǵannan keıin barlyq úırenýshilerge «zapastaǵy leıtenant» áskerı ataǵy beriledi jáne olar avtomatty túrde Qarýly Kúshteriniń jumyldyrý rezervine engiziledi, – dedi Qorǵanys mınıstrligi bilim jáne ǵylym departamentiniń bastyǵy Aıgúl Tólembaeva.
Aıta keteıik, atalǵan mamandyqty ıgerý barysynda qyzdar er balalarmen birge saptyq, jaýyngerlik daıarlyq, jarǵy, áskerı topografııa sekildi pánderdi oqyp, osy baǵyttaǵy ǵylymmen aınalysa alady.
Talǵat RAIYMBEK,
«Egemen Qazaqstan».