Búgin Mádenıet jáne sport mınıstrliginde onlaın formatta «2021 - Balalar ádebıeti jyly» aıasynda Mınıstrliktiń usynysymen «Altyn saqa» balalar baspasynan shyqqan 100 kitaptyń tusaýkeser rásimi ótti, dep habarlaıdy Egemen.kz mınıstrliktiń baspasóz qyzmetine silteme jasap.
Is-sharaǵa Mádenıet jáne sport mınıstri Aqtoty Raıymqulova, Mádenıet jáne sport mınıstriniń keńesshisi Málik Otarbaev, «Altyn saqa» balalar baspasynyń dırektory Qanat Ibragımov, baspanyń bas redaktory Saıat Qamshyger, «Baldyrǵan» jýrnalynyń bas redaktory Dúısen Maǵlumov, «Móldir bulaq» jýrnalynyń bas redaktory Dáýletbek Baıtursynuly, balalar jazýshysy Meıirjan Jylqybaı, Serikbol Hasan, balalar ádebıetiniń jáne BAQ ókilderi qatysty.
Aqtoty Raıymqulova Mınıstrlik bul júz kitapty respýblıkamyzdyń barlyq kitaphanasy men óner ordasy, mádenıet oshaǵy arqyly nasıhattaýǵa, oqyrmandarynyń tabylýyna qoldaý kórsetýge daıyn ekenin jetkizdi.
«Tárbıelik, tanymdyq, damytýshylyq qyrlary aıryqsha osy kitaptar elimizdiń bolashaq tulǵalarynyń qalyptasýyna ıgi áser etsin. Qazaq eliniń bolashaǵy – balalarymyz ben jastarymyz. Balalaryn oılaǵan eldiń erteńi nurly, shýaqty, sáýleli ekeni aıdan anyq.
Sondyqtan búgingi basqosýymyzdy paıdalana otyryp osy baspanyń basy-qasynda júrgen Qanat Ibragımovqa, Saıat Qamshygerge jáne 100 kitapty daıyndaǵan barlyq avtor men shyǵarmashylyq topqa alǵys aıtamyn.
Sonymen birge bıylǵy «Balalar ádebıeti jyly» aıasynda osyndaı úlgide kitap shyǵaryp, jas búldirshinderimizdiń ósýine, damýyna jáne ulttyq mádenıetimizdiń nasıhattalýyna úles qosyp otyrǵan barlyq baspa men kitaphanaǵa, balalar ádebıetiniń ókiline, kórnekti aqyn men jazýshyǵa shyn rızashylyǵymdy bildiremin», dedi.
Aıta keteıik Mınıstrlik tarapynan 2021 jyldyń «Balalar ádebıeti jyly» dep jarııalanýynyń nátıjesinde Almaty qalasynda «Altyn saqa» balalar baspasy ashylyp, jas oqyrmandarǵa arnap kitap shyǵara bastady. Osy ýaqytqa deıin baspa balalarǵa arnalǵan 100 kitap shyǵaryp úlgerdi.
Atalǵan 100 kitaptyń ishinde balalarǵa arnalǵan ertegiler bar. Ol ertegilerdiń avtorlary Jibek Zınelova, Shrazaddın Kanııazov, Meıirjan Jylqybaı, Serik Erǵalı, Málike Serǵaly, Alýa Esbolatqyzy, Nurbergen Baqytuly sııaqty qalamgerler. Balalardyń qazirgi suranysyna saı jańa urpaqqa arnalǵan bul ertegilerdiń barlyǵy shaǵyn kólemde, oqýǵa jeńil, túsinýge ońaı. Kitaptardyń bir ereksheligi – barlyǵynda QR kod bar. Uıaly telefonnyń QR kody arqyly ertegilerdiń bárin tyńdaýǵa bolady.
Sonymen qatar kitaptyń ishinde balalarǵa arnalǵan áńgimeler de kóp. «Ulttyq mereke», «Anam ekeýmiz», «Áke men bala», «О́ser urpaqqa ónege», «Anam bárin sezedi», «Syılyq» sııaqty áńgime kitaptardyń attary aıtyp turǵandaı, ulttyq qundylyqtarymyzdy áspetter, búgingi jańa zaman balalaryna jańa talaptar bıiginen jazylǵan.
Al «Asyl mura», «Jemister», «Kókónister», «Úı janýarlary» sııaqty boıamaqtar kishkentaı balalarǵa sýretterdi boıap, sol zattar jaıly taqpaq oqyp, jattaýǵa múmkindik beredi. Mundaı qazaqy dúnıetanymdaǵy boıamaqtar ul-qyzdardyń durys tálim-tárbıe alyp, paıdaly aqparat qabyldaýyn, boılaryndaǵy jaqsy qabiletterdiń damýyn jetildiredi.
«Aýa raıy», «Kólikter», «Mamandyqtar», «Jol erejeleri», «Kóńil kúı» tárizdi kishkene balalarǵa arnalǵan tanymdyq kitapshalardyń da mańyzy aıryqsha. Bul kitapshalar arqyly kishkene búldirshinder aınalany tanıdy, qorshaǵan ortany zerttep biledi.
Osy 100 kitaptyń ishinde aýdarma ertegiler de bar. Olardyń qataryndaǵy Hans Krıstıan Andersenniń «Qar patshaıymy», «Qaısar qalaıy soldat» sııaqty kópshilikke málim 9 kitabyn erekshe aıtýǵa bolady.
Bul kitaptar jyltyr, ofsettik qaǵazda 2000 taralymmen jaryq kórdi. Kitaptardy arnaıy saralaýdan, irikteýden ótkizip baryp basatyn jaǵdaı qalyptasqan. Ol úshin tájirıbeli qalamger, redaktor, psıhologtardan turatyn arnaıy saraptaý komıssııasy jumys isteıdi.
Kitaptar Almas Syrǵabaev, Maqsat Alıev, Ramazan Peıizov, Anna Nozdrına syndy sýretshi-ıllıýstratorlardyń sýretterimen árlengen.
Aqtoty Raıymqulova búgin jas oqyrmanǵa jol tartatyn kitaptar jarqyn bolashaqqa qosylǵan qomaqty úles ekenin aıtyp, dál osyndaı ıgi jobalar aldaǵy ýaqytta da jalǵasyn taba beretinine senim bildirdi.
«О́zderińizge málim, Mádenıet jáne sport mınıstrliginiń usynysy boıynsha bıylǵy 2021 jyl «Balalar ádebıeti jyly» bolyp jarııalandy. Osy oraıda jyldyń basynan beri birneshe is-shara, joba júzege asyp jatyr.
Jyldyń basynda Almaty qalasynan ashylǵan «Altyn saqa» balalar baspasy da elimizdiń búldirshinderine túrli kitaptar shyǵara bastaǵany kóńil qýantady. Ár jastaǵy balalarǵa arnalǵan túrli ertegiler, áńgimeler, taqpaqtar men jumbaqtar, aýdarma ertegiler men ártúrli shyǵarmalardy shyǵaryp jatqan baspanyń ónimderi aldaǵy ýaqytta jas oqyrmandardyń kóńilderinen shyǵyp, júrekterine jete berer degen oıdamyn.
Baspa shyǵarǵan «Jolterek», «Erekshe ertegiler», «Kámpıtti jegen kim?», «Alyptyń oqıǵasy» sııaqty ertegiler búginde óz oqyrmandaryn taýyp úlgerdi. Baspanyń osy oraıda jańa, jas avtorlarmen jumys istep, olardyń zamanaýı ertegilerin jaryqqa shyǵarýǵa degen umtylys men talpynysy bir júıege túskeni qatty qýantady.
«Jigittiń sultany bol» degen kitapta ul balalardyń tulǵa bolyp qalyptasýy úshin túrli paıdaly keńester aıtylǵan eken. «Ádebi ádemi hanshaıym bol» - qazaqtyń ár qyzynyń qolynda júrerlikteı asyl sózder men ónegege toly kitap. Bul kitapty segizinshi synypty bitirgen qyzdyń jazyp shyqqany, kitapty jazarda ájesimen, anasymen aqyldasyp, keńes alýy, kóptegen kitapty oqyp, izdenip baryp osy eńbekke kiriskeni aıtýǵa turarlyq», dedi mınıstr.
Sóz arasynda ana tilimizde shyǵyp jatqan álemdik klassıkterdiń ertegileri birneshe býynǵa rýhanı azyq bolǵanyn, mundaı týyndylar Táýelsiz elimizdiń jas oqyrmandaryna da qyzyqty ekenin atap ótti.
«Bıyl «Balalar ádebıeti jylyna» oraı áli jyldyń aıaǵyna deıin talaı júzdegen kitap bul baspadan shyǵyp, elimizdiń bar óńirlerindegi jas oqyrmandarǵa jol tartady dep senemin. Aldaryńyzdaǵy balalarǵa arnalǵan 100 kitap jyldyń aıaǵyna deıin 1000 kitapqa aınalýyna tilektespin», dedi mınıstr.