Qasym-Jomart Kemeluly elimizdiń órkendeý jolyna óreli úles qosqan óte tájirıbeli saıasatker. Muny ol kisiniń Úkimet basqarǵan kezdegi, basqa da jaýapty qyzmetter atqarǵan tustaǵy sarabdal sheshimderinen, jasaǵan jumystarynan anyq kóremiz. Memlekettiń ishki de syrtqy jaǵdaıyn jetik biletin, qoǵam ahýalyn jazbaı tanıtyn tulǵa dep tolyqqandy aıtýǵa bolady. Memleket basshysyna júkteletin eń negizgi mindet − eldiń táýelsizdigin, qaýipsizdigin qamtamasyz etý. О́ıtkeni Prezıdent syrtqy saıasatta osy eldiń ekonomıkasy men turaqtylyǵyn ári qaraı jetildirý boıynsha barlyq isti tikeleı ózi júrgizedi. О́zine memleket jaýapkershiligin tolyq júkteıdi. Osyny jan júıesimen sezingen jańa Prezıdentimiz saltanatty rásim kezinde sóılegen sózinde: «Meniń maqsatym – qoǵamnyń birligin qamtamasyz etip, ár azamattyń quqyǵyn qorǵaý» dep shegelep aıtty.
Qazir álemdegi halyqaralyq jaǵdaı asa kúrdeli kezeńde turǵanyn kez kelgen kózi ashyq azamat bilýge tıis. Ekinshi dúnıejúzilik soǵystan keıin qalyptasqan halyqaralyq quqyq buzyldy. Alpaýyt memleketter basqa memleketterdiń ishki isine aralasatyn boldy. Tipti kúshti derjavalar ózinen álsizderge óktemdik tanytyp, tize batyratyndy shyǵardy. Olardyń maqsaty ózine tıimdi, yńǵaıly júıe ornatýǵa tyrysyp, tek óz múddesin qorǵaıtyny ashyq baıqalýda. Dúnıejúzilik saýda uıymynyń bedeli tústi. Ár memleket óziniń jeke basyn kúıttedi. Bul óz kezeginde álem elderiniń ekonomıkasynyń órisin taryltyp, basqa da salalarǵa salqynyn tıgize bastady. Kórshiles Reseı Batystyń óte qatań sanksııasyna ushyrap otyr. AQSh-tyń qysymy Qytaı sekildi iri memlekettiń ekonomıkalyq damýyna da keri áserin tıgizip jatqanyn kórip otyrmyz. Olarda da saýda-ekonomıkalyq qatynastar kúrdelene bastady. Álemde mundaı oqıǵalar bizdiń de ekonomıkamyzdy aınalyp ótpeıtini belgili. Álemdik naryqta shıkizat baǵasy tómenge quldılap barady. Muny kúndelikti baıqap otyrmyz. Osyndaı kúrdeli jaǵdaılar Memleket basshysyna úlken jaýapkershilikter júkteıdi. Osy sekildi halyqaralyq deńgeıdegi kúrdeli máselelerdi tereń sezinetin, el úshin mańyzdy sheshimder qabyldaı alatyn, sol alpaýyt elderdiń basshylarymen tepe-teń dárejede mámile jasaı alatyn saıasatkerdiń memleket basyna kelýi halqymyzdy ońǵa bastaıtyn ıgi is boldy dep esepteımin.
Rasynda da Qasym-Jomart Toqaev elimizdi kúrdeli kezeńnen aman alyp ótetin, osy talaptarǵa barlyq jaǵynan saı keletin tulǵa. Toqaevtyń halyqaralyq saıasattaǵy bıik bedeli basqa elderdiń bizge tize batyrýyna, óktemdik tanytýyna jol bermeıdi. Eldegi ishki jaǵdaı qanshalyqty kúrdeli bolǵanmen, biz ózimizdiń yntymaǵymyzdy arttyra berýimiz kerek. Beıbitshilik pen turaqtylyq bolsa ǵana biz kez kelgen qıyndyqty ońaı eńsere alamyz. Al ishimizden irip jatsaq, odan tek barlyq sala japa shegedi. Baǵa jetpes baılyǵymyz táýelsizdik deıtin uly tuǵyrymyzdy shaıqap almaýymyz kerek. Prezıdentimiz ulyqtaý rásiminde alǵa tartqan on mindet elimizdi damýdyń dańǵyl jolyna jeteleıtin negizgi qadamdar. Osynyń barlyǵyn jan-jaqty saralap jolǵa qoıý úshin aldymyzda zor jaýapkershilikter tur. Bul jumystarda Qasym-Jomart Kemelulyn biraýyzdan qoldap, jańa jetistikterge birge qol jetkizýge kúsh biriktirýimiz mańyzdy.
Aldymyzda naqty qandaı problemalar turǵanyn Memleket basshysy jaqsy sezinip otyr. Halyqtyń tabysyn arttyrý, qoǵamdy jegideı jegen jemqorlyq dertiniń tamyryna balta shabý, kásipkerlerdi qoldap, olardyń iskerlik belsendilikterin arttyrý jáne qorǵaý, jańa jumys oryndaryn ashý, ádil áleýmettik saıasat, sapaly memlekettik qyzmet kórsetý, halyqtyń qolaıly ómir súrýi úshin taza aýyzsýmen qamtý, joldardy retke keltirý máselelerin basty nazarǵa alyp otyr. Dúıim jurttyń aldynda ulyqtaý rásimin birden ótkerip shuǵyl iske kirisip ketkeni kóńil qýantady.
Prezıdent tilge tıek etken baǵyttar shyn máninde memleketimizdi ornyqty damýdyń jańa deńgeıine shyǵarýshy kúsh ekenine kámil senemiz. «Aldaǵy birneshe jyl bederinde zamanymyzdyń basty suraǵy: qandaı elder progress sapynan oryn alatynyna, qaısysy álemdik damýdyń jıeginde qalatynyna jaýap beriletin bolady. Ekonomıkalyq, áleýmettik jáne saıası progress – bul bizdiń zamanaýı syn-tegeýrinderge birden-bir durys jaýabymyz», − degen Toqaev, álemdegi jetekshi tehnologııalarǵa umtylyp, jahandyq damýdyń jańa deńgeıine bet alǵan memleketimizdiń aldaǵy baǵyttaryn aıqyndap berdi. Talapqa saı, zerdeli jastardy jetekshi salalardy basqarý isine tartý ıdeıasy da óte ózekti másele dep aıta alamyz. Sebebi boıynda ulttyq namysy qaınaǵan jasampaz jastar elimizdiń jarqyn bolashaǵy, táýelsizdigimizdiń negizgi tiregi. Olardy úlken isterge baýlý bolashaǵymyzǵa jasalǵan ıgi qadam.
Halyqaralyq qarjy naryqtarynyń turaqsyzdanýyna qaramastan, halyqtyń tabys kólemin arttyrý, tabysy joǵary jáne tómen azamattardyń arasyndaǵy alshaqtyq syndy ótkir máseleni retteý úshin keshendi sharalar qabyldaý qajettigi kezek kúttirmeıtin sharýalar. Eń áýeli qoǵamǵa senim men kelisim kerek. Munyń arǵy jaǵynda bılik pen qoǵam arasyndaǵy dıalogtyń berik ornaýy turǵanyn jaqsy bilemiz. Prezıdenttiń osy máselege de asa názik qarap, basa kóńil bólip otyrǵany oryndy sheshim. Álemdik tájirıbege súıene otyryp, damýdyń basty prınsıpterin negizge alyp jumys júrgizetin Qasym-Jomart Toqaev elimizdiń ishki turaqtylyǵy men damýyn órge súırep, syrtqy saıasattaǵy joǵary bedelin odan ári bıiktete beretinine bek seneıik. Elimiz úshin osynaý tarıhı kezeń baıandy bolyp, jan-jaqty jańǵyrýlar kósh túzeı berse degen tilektemiz.
Ikram ADYRBEKOV,
memleket jáne qoǵam qaıratkeri