Túrkistan oblysynda polıseıler 600-ge jýyq turǵyndy qabyldady, – dep habarlaıdy Egemen.kz Polisia.kz-ke silteme jasap.
Aı saıyn respýblıka kóleminde azamattarmen keri baılanysqa túsý maqsatynda uıymdastyrylyp júrgen “Jolda qabyldaý” aksııasynyń búgin ekinshi kúni. Eki kúndik qorytyndy boıynsha qabyldaýǵa 600-ge jýyq turǵyn keldi. Olar óz máseleleri boıynsha polıseılerdiń kómegine júgindi. Atalmysh aksııany oblystyń polıseıleri qala ortalyǵynda ornalasqan “Mamandandyrylǵan halyqqa qyzmet kórsetý ortalyǵynda” ótkizdi.
Sonymen qatar qala, aýdandyq polısııa basqarma bólimderiniń qyzmetkerleri óz aýmaqtaryndaǵy HQKO-nyń aldynda otyryp, qabyldaý ótkizdi.
Azamattar polıseılerge ózderiniń Armenııalyq kólikterin tirkeýge baılanysty jáne oǵan qandaı qujattar qajet ekendigin tolyǵymen bildi. Qabyldaýǵa kelgenderge jeke-jeke keńester men qoıylǵan suraqtaryna jaýaptar berildi. Budan basqa, telefon baılanysy arqyly da, áleýmettik jelilerdegi onlaın-qarym-qatynas arqyly da jedel jeli jumysy uıymdastyryldy.
Aksııa aıasynda basqa da nıet bildirýshiler kólik quraldaryn tirkeý, Ákimshilik aıyppuldardy tóleý tártibi, júrgizýshi kýálikterin berý, sondaı-aq ózge de máseleler boıynsha qajetti keńesterdi aldy. Osylaısha 26 tamyz kúni tańerteń saǵat 09.00-den bastap 27 tamyz keshki saǵat 19.00-ge deıin jalǵasqan aksııaǵa qatysýshylar óz kezeginde polıseılerge alǵystaryn jetkizdi. Aıta ketetin jaıt, Túrkistan oblysynda tirkeýge saı keletin sol jaq rýldi 330 armenııalyq kólik bar bolsa, onyń tirkelmeı qalǵany – alty.
Sondaı-aq QR Úkimetiniń qaýlysyna sáıkes armenııalyq kólikterdiń basqarý rýli oń jaqtan sol jaqqa aýystyrylyp qaıta jabdyqtalyp tirkeýden ótýine bolady. Bul shara aǵymdaǵy jyldyń 1 qarashasyna deıin jalǵasady.