Elimizdiń barlyq óńirlerinde "Altyn Jebe-2020" arnaıy operasııalar kúshteriniń komponentterin keshendi tekserýi ótýde, dep habarlaıdy Egemen.kz Qorǵanys mınıstrliginiń baspasóz qyzmetine silteme jasap.
Is-shara Qorǵanys mınıstriniń birinshi orynbasary – Qazaqstan Qarýly Kúshteri Bas shtabynyń bastyǵy general-leıtenant Murat Bektanovtyń basshylyǵymen uıymdastyryldy.
Dabyl boıynsha kóterilgen bólimder men bólimsheler oqý alańdary men polıgondarǵa shyqty. Keshendi tekserý barysynda bir aı ishinde kúshter men quraldardy qoldanýdy uıymdastyrý máseleleri pysyqtalady. Sondaı-aq arnaıy oqý-jaýyngerlik mindetter de oryndalmaq.
Armııalyq taktıkalyq atys jattyǵýlaryn oryndaý men artıllerııa atysyn túzetýge, táýlik boıy armııalyq avıasııany júrgizýge erekshe nazar aýdarylatyn bolady.