Volonterlar jylynyń nátıjesi boıynsha Nazarbaev Zııatkerlik mektepteriniń ókilderi birden úsh nomınasııada jeńimpaz atandy, dep habarlaıdy Egemen.kz.
Jyldyń resmı jabylý saltanatynda Prezıdent Qasym-Jomart Toqaev elimizdegi eriktilerdiń rólin aıryqsha atap ótti. Ár óńirde «Jyl volonteri» halyqaralyq syılyǵyn oblys ákimderi tabystady. Birden úsh nomınańııada Qaraǵandy, Petropavl jáne Oral qalalaryndaǵy Nazarbaev Zııatkerlik mektepteriniń eriktiler uıymy jeńimpazdar qatarynan kórindi.
Oqýshylardyń boıynda rýhanı jáne adamgershilik qundylyqtardy damytýǵa baǵyttalǵan «Qoǵamǵa qyzmet etý» áleýmettik jobasy aıasynda belsendi qyzmet etip júrgen Qaraǵandy qalasyndaǵy Nazarbaev Zııatkerlik mektebiniń «Meıirim kópiri» eriktiler klýby «Úzdik volonterlik uıym» ataǵyna laıyq dep tanyldy.
– Bizdiń qyzmetimizge osyndaı joǵary baǵa bergeni – elimizdiń belsendi jáne jaýapty azamattaryn tárbıeleýdegi mańyzdy jumystyń jemisi dep bilemiz, – deıdi klýb jetekshisi, pedagog-uıymdastyrýshy-kýrator Gúlnara Seıtova.
«Salaýatty ómir saltyn nasıhattaýǵa belsendi qatysqany úshin» atalymynyń ıegeri petropavldyq zııatker Inessa Anarbaevanyń eriktilikpen aınalysqanyna úsh jyl bolǵan. Keńpeıil Inessa ótken jyly óziniń týǵan qalasynda «Adal» atty volonterlik klýbtyń negizin qalapty:
– Baıqaý úsh kezeńnen turdy. Jeńimpazdar qatarynan kóringenime qýanyshtymyn. Eriktilik qyzmet – ár adam úshin adal, meıirimge toly mindet. Bul bizdiń ortaq jeńisimiz! Qoldaý bildirgenderge alǵysym sheksiz, – dedi qýanyshymen bólisken Inessa.
Oral qalasyndaǵy Nazarbaev Zııatkerlik mektebiniń komandasy «Áleýmettik máselelerdi sheshýge qosqan úlesi úshin» nomınasııasy boıynsha úzdik atandy. Eriktiler túrli sheberlik saǵattar, qaıyrymdylyq sharalar, joldastyq kezdesýler uıymdastyryp júr. 68 aýdıoshyǵarma dybystandyrylyp, qazaq jáne aǵylshyn álipbıi negizinde taktıldi kitap jasaldy:
– Áleýmettik sharalar bıylǵy jyly onlaın formatta jalǵasýda. Mektep oqýshylary sóıleý jáne qımyl-qozǵalys qabileti buzylǵan balalarǵa arnap qoldanbaly jáne oqý kitaptary, broshıýralar, sondaı-aq beıneleý quraldary men óner sabaǵynda jasalǵan oıynshyqtardyń kolleksııasyn jınaýda, – deıdi mektepishilik «Biz birgemiz!» volonterler komandasynyń jetekshisi, ózin-ózi taný pániniń muǵalimi Aınur Babıkenova.
Nazarbaev Zııatkerlik mektepteriniń oqýshylary úshin eriktilik –qaıyrymdylyqtyń eń jaqsy ulttyq dástúrlerin jańǵyrtý, meıirimdilik pen janashyrlyqqa tárbıeleý, elimizdiń jáne óz óńirleriniń áleýmettik jáne mádenı máselelerin sheshýge atsalysý.