Elimizdegi áleýmettik belsendiler men blogerler Uly Otan soǵysy ardagerleriniń qurmetine oraı onlaın portal ashty, dep habarlaıdy Egemen.kz
Qazaqstandyq blogerler men qoǵam belsendileri «Máńgilik polk» aksııasyn onlaın formatta ótkizý úshin portal jasap shyǵardy. Joba ataýy - «Jaýjúrek polk». Joba avtorlarynyń ishinde «Ulttyq Pikirsaıys Federasııasynyń» Prezıdenti, «Jaqsy Bolady» YouTube arnasynyń avtory Buharbaı Bolat, tanymal telejúrgizýshi Mahabbat Esen, bloger Iаkov Federov jáne «Ave adicus» YouTube arnasynyń avtory Ashirbek Ádilet.
Joba avtorlary álemdik pandemııaǵa baılanysty aksııany oflaın formatta ótkizý múmkin emes ekenin eskerip, soǵys batyrlaryna onlaın formatta erekshe qurmet kórsetýdi uıǵardy.
«Bul jaı ǵana portal emes — bul ekinshi dúnıejúzilik soǵys batyrlaryna arnalǵan máńgilik estelik albomy. Biz sizdermen birge Bostandyq úshin óz ómirlerin qıǵan, jarqyn bolashaǵymyz úshin qan tókken atalarymyzdyń erlikterin qurmetteýimiz qajet» dep jazdy, joba avtorlarynyń biri Mahabbat Esen.