Qazaqstan Prezıdenti Qasym-Jomart Toqaev Armenııa Prezıdenti Armen Sarkısıanmen kezdesti, dep habarlaıdy Egemen.kz Aqordanyń baspasóz qyzmetine silteme jasap.
Kelissóz barysynda Qasym-Jomart Toqaev pen Nur-Sultan qalasyna jumys saparymen kelgen Armen Sarkısıan saıası dıalogty, saýda-ekonomıkalyq jáne mádenı-gýmanıtarlyq baılanystardy nyǵaıtýǵa basa mán bere otyryp, qazaq-armıan yntymaqtastyǵyn damytý máselelerin talqylady. Sonymen qatar Prezıdentter Eýrazııalyq ekonomıkalyq odaq, UQShU jáne basqa da halyqaralyq qurylymdar aıasyndaǵy yqpaldastyqtyń perspektıvalaryn qarastyryp, jahandyq jáne óńirlik kún tártibindegi máseleler boıynsha pikir almasty.
Memleket basshysy ekijaqty yntymaqtastyqqa tyń serpin berý turǵysynan Armenııa Prezıdentiniń osy saparynyń mańyzdy ekenin atap ótti.
– Armenııa – bizge dostas memleket. Elderimiz arasyndaǵy ózara qarym-qatynastar ejelden kele jatqan dástúrlerge negizdeledi. Árıne, biz yqpaldastyǵymyzdyń bir ornynda turyp qalmaı, jańa mazmunmen tolyǵa otyryp damýyna múddelimiz. Sondyqtan elderimizdiń úkimetteri men naqty salalyq vedomstvolary osy maqsatqa qol jetkizý úshin jumys istep jatyr, – dedi Qasym-Jomart Toqaev.
Qazaqstan Prezıdenti túrli salalar boıynsha qarym-qatynastardy nyǵaıtý úshin mol múmkindikter bar ekenin atap ótip, Armenııanyń úkimettik delegasııasynyń jýyrda Qazaqstanǵa jasaǵan saparynyń qorytyndylaryn oń baǵalady.
Sonymen qatar Memleket basshysy EAEO, UQShU, TMD, BUU jáne EQYU aıasyndaǵy ekijaqty yqpaldastyqtyń jaqsy qarqynmen jalǵasa beretinine senim bildirdi.
Armen Sarkısıan óz kezeginde Qazaqstanǵa jumys saparymen kelýge múmkindik jasaǵany úshin Qasym-Jomart Toqaevqa alǵys aıtty.
– Men úshin Qazaqstanǵa kelý – belgili bir maǵynada óz úıime, dostaryma kelgenmen birdeı. О́zińiz aıtqandaı, bizdiń halyqtarymyz arasyndaǵy qarym-qatynastar óte jaqsy jáne onyń tarıhı tamyry tereńde, – dedi Armenııa Prezıdenti.
Armen Sarkısıan Qasym-Jomart Toqaevtyń Nur-Sýltan men Erevan arasyndaǵy baılanystardy odan ári keńeıtýdiń áleýeti zor degen pikirimen kelisti. Osy rette ol saýda, bilim berý, jańa tehnologııalar, tamaq ónimderin qaıta óńdeý salalary boıynsha jasalyp jatqan qolaıly sharttarǵa nazar aýdaryp, atalǵan yntymaqtastyqtyń mazmunyn baıytyp, keńeıte berýge nıetti ekenin jetkizdi.