Qasym-Jomart Toqaev alǵashqy járdem jáne konsýltasııalyq-dıagnostıkalyq kómek kórsetýge arnalǵan zamanaýı medısınalyq quraldarmen jabdyqtalǵan kabınetterdi aralady, dep habarlaıdy Egemen.kz Aqordnyń resmı saıtyna silteme jasap.
Emhanada rentgenografııa, mammografııa, flıýorografııa, LOR-kombaın, saraptamalyq deńgeıdegi ýltra-dybystyq zertteý jáne basqa da medısınalyq apparattar bar. Emhananyń sońǵy úlgidegi apparattarmen jabdyqtalýy aýrýdy der kezinde anyqtap, sapaly medısınalyq kómek kórsetýge múmkindik beredi.
«Salaýatty Astana» jaýapkershiligi shekteýli seriktestigine qarasty jańa ambýlatorııalyq-emhanalyq keshen bir aýysymda 500 adamdy qabyldaıdy.
Memleket basshysyna medısınalyq ortalyqta tirkelgen turǵyndarǵa 23 sala boıynsha alǵashqy medısınalyq-sanıtarlyq jáne konsýltasııalyq-dıagnostıkalyq kómek kórsetiletini týraly aıtyldy. Sondaı-aq eresekter men balalarǵa ońaltý qyzmetteri kórsetiledi. 150 oryndyq kúndizgi stasıonar jumys isteıdi.
Prezıdent medısınalyq ortalyqtyń ujymyna jedel járdem kóligin alýǵa sertıfıkat tabystady.
Qazirgi tańda elordada 180 myń adam koronavırýsqa qarsy ekpeniń birinshi komponentin alǵan. 128 myńnan astam azamat ekpeniń ekinshi komponentin saldyrdy. Eńbek ujymdaryn vaksınalaý belsendi júrgizilip jatyr.
Ujymdyq ımmýnıtetti qalyptastyrý úshin 650 myńnan astam adamǵa nemese qala turǵyndarynyń 60 paıyzyna ekpe egý josparlanýda.
Alǵashqy medısınalyq-sanıtarlyq kómek kórsetý uıymdaryndaǵy vaksınalaý pýnktteri 100-ge deıin kóbeıdi, sondaı-aq, saýda jáne oıyn-saýyq ortalyqtarynda qosymsha 8 pýnkt qyzmet kórsetedi.