Soltústik Qazaqstan oblysynyń krımınalısteri qylmysty ashýda qajet tyń ádis – teride qalǵan saýsaq izderin anyqtaýdy meńgerdi, dep habarlaıdy Egemen.kz.
SQO polısııa departamenti baspasóz qyzmetiniń málimetinshe, jedel-krımınalıstıkalyq basqarmanyń qyzmetkerleri elimizde alǵashqylardyń biri bolyp teriden saýsaq izderin anyqtaý jáne alý ádistemesin ıgerdi.
«Teride qalǵan saýsaq izin anyqtaý úshin hımııalyq reaktıvter qoldanylady. Hımııalyq zattardyń áseri bóten adamnyń saýsaq izderin anyqtaýǵa múmkindik beredi. Olar arnaıy metall plastınaǵa kóshiriledi. Bul jańashyldyq adam óltirý, tonaý, qaraqshylyq, zorlaý sııaqty aýyr jáne asa aýyr qylmystardy, ıaǵnı qylmysker men jábirlenýshi arasynda fızıkalyq baılanys bolatyn qylmystardy ashýǵa múmkindik beredi», deıdi SQO Polısııa departamenti bastyǵynyń orynbasary Eńbek Sembın.
Jańa ádistemeni jumysqa engizýge hımııa boıynsha bilimi bar tájirıbeli krımınalıst, polısııa maıory Aleksandr Hlevov belsendi atsalysty. Zertteýlerge volonter retinde jedel-krımınalıstıkalyq basqarmanyń qyzmetkerleri qatysty. Sondaı-aq krımınalıster máıitterde zertteýler júrgizý úshin máıithanalarǵa bardy.
«Eki aıǵa sozylǵan tynymsyz eńbek óz jemisin berip, biz oń nátıjege qol jetkizdik. Tiri adamdar men máıitterdiń terisinde qalǵan saýsaq izderin anyqtaı bastadyq, bul - shaǵyn fragmentterden bastap, jeke adamdy anyqtaýǵa múmkindik beredi. Bizdiń jumysymyzǵa polısııa departamenti bastyǵynyń orynbasary Eńbek Sembın jetekshilik etip, QR Ádilet mınıstrliginiń SQO boıynsha sot saraptamalary ortalyǵynyń qyzmetkeri Irına Platko úlken kómek kórsetti. Bul ádis burynnan belgili, alaıda qoldanýda qıyndyqtar týyndaǵan, sondyqtan keńinen paıdalanbaǵan. Ádisti jumysta paıdalana alatyndaı etip jetildirdik.
Atalǵan jańashyldyqty oblystyq basqarmanyń qyzmetkerleri ıgerdi jáne aýmaqtyq bólinisterge engiziledi», deıdi SQO polısııa departamenti jedel-krımınalıstıkalyq basqarmanyń bastyǵy Igor Semenov.