Alaıatar da zaman aǵymyna qaraı beıimdelip, tehnıkanyń kómegimen túrli qýlyqtarǵa barýda. Almaty polısııasy alaıaqtyqtyń jańa túrinen abaı bolýdy eskertti, dep habarlaıdy Egemen.kz.
Qalanyń krımınaldyq polısııasynyń málimetinshe, alaıaqtar Instagram jelisiniń belsendi qoldanýshylaryn paıdalanady.
«Alaıaqtar, ádette, sizdi jazylýshylar sanyna qaraı tańdaıdy. Jazylýshylary kóp kez kelgen adam «kók belgini» alǵysy keledi - ol sizdiń paraqshańyzdyń jalǵan emesin jáne ony Instagram ákimshiligi rastaıtynyn bildiredi. Alaıaqtar ózine qajet adamdy tańdaǵannan keıi Instagram-daǵy jalǵan qoldaý qyzmeti paraqshasynan sizge habarlama jiberip, sizge «kók belgi» statýsy berilgeni týraly tikeleı SMS-habarlama jiberedi. Ol úshin siz Instagram-yńyzdyń qupııa sózin engizý úshin siltemege ótýińiz kerek bolady. Qupııa sózdi engizý arqyly avtomatty túrde ótinimińiz qabyldanǵany jáne úsh kún ishinde qaralatyny týraly jazylǵan paraqshaǵa túsesiz. Birneshe saǵattan keıin ózińizdiń paraqshańyzǵa kirý múmkindiginen múldem aıyrylasyz. Osydan keıin uıaly telefonyńyzǵa nemese WhatsApp-qa paraqshańyzdyń buzylǵany týraly jáne shamamen 200-1000 AQSh dollaryn tóleý kerek degen habarlamalar kele bastaıdy», dedi Almaty qalasy Polısııa departamenti basshysynyń orynbasary Rústem Ábdrahmanov.
Osy tizbekti qoldaný arqyly ınternettegi alaıaqtyq deregi boıynsha tek keıingi birneshe kúnde alty adam Almaty polısııasyna shaǵym túsirgen.
«Munda azamattar qabyldaýy qajet aqparattyq qaýipsizdik sharalary mańyzdy. Sizden árdaıym osyndaı habarlamalarǵa kúmándanyp, olarǵa syn kózben qaraýyńyzdy suraımyz. Biz saq bolýǵa jáne qyraǵylyq tanytýǵa shaqyramyz», dedi Rústem Ábdrahmanov.