Qurǵaqshylyqtan eń kóp zardap shekken Mańǵystaý men Qyzylorda oblystaryna jem satyp alýǵa ketken shyǵyndardy óteý úshin Úkimettiń rezervinen 3,6 mlrd teńge bólindi. Bul týraly Úkimet otyrysynda Aýyl sharýashylyǵy mınıstri Erbol Qarashókeev aıtty, dep habarlaıdy Egemen.kz.
«Aǵymdaǵy jyldyń qurǵaq aýa raıy mal azyqpen qamtamasyz etýde belgili bir qıyndyqtar týǵyzdy. Jaǵdaıdy túzetý úshin Úkimet naqty sharalar qabyldaýda. Búginde jem-shópti daıyndaý máseleleri boıynsha jergilikti ortalyq atqarýshy organdardyń qyzmetin úılestirý jónindegi respýblıkalyq jedel shtab jumys isteıdi. Zardap shekken aımaqtarǵa qarjylaı kómek kórsetiledi. Sonymen qurǵaqshylyqtan eń kóp zardap shekken Mańǵystaý, Qyzylorda oblystary Úkimettiń rezervinen jem satyp alýǵa ketken shyǵyndardy óteýge 3,6 mlrd teńge bólindi», dedi ol.
Sonymen qatar Mańǵystaý oblysyna 5,3 mlrd teńgeni jem-shóp daıyndaý maqsatynda paıdalanýǵa ruqsat berý máseleleri pysyqtalyp, jergilikti bıýdjetten 9,1 mlrd teńge bólingenin aıtty.
«Taǵy qosymsha 4,5 mlrd teńge bólinýi múmkin», dep qosty Erbol Qarashókeev.