Polshanyń Zakopane qalasynda erkin kúresten halyqaralyq týrnır óz máresine jetti. Bul jarysty Qazaqstannyń balýandary segiz júldemen qorytyndylady, dep jazady Egemen.kz.
Básekeler barysynda qarsylastarynyń aıaǵyn kókten keltirgen tórt órenimiz jeńis tuǵyrynyń eń bıik satysyna kóterildi. Atap aıtsaq, Meırambek Qartbaev (57 kılo) pen Ádil Ospanov (65 kılo) fınalda jarys qojaıyndaryn qapy qaldyrdy. Bolat Saqaev (79 kılo) shveısarııalyq Tangýı Derbellaıǵa shań qaptyryp ketse, Azamat Dáýletbekov (86 kılo) latvııalyq Ivar Samýsonokske san soqtyrdy. Aqtyq saıysta polshalyq Magomedmýrad Gadjıevke jol bergen Talǵat Syrbaz (70 kılo) kúmis medaldi ıelense, Nurqoja Qaıpanov (74 kılo) jáne Oleg Boltın men Álisher Erǵalı (125 kılo) qolaǵa qol sozdy.
Jarys qorytyndysy boıynsha jalpy esepti Qazaq eli balýandary kósh bastady. Qorjynynda úsh altyny bar Polsha ekinshi oryn alsa, bir bas júldeni oljalaǵan Reseı úshinshi satyǵa taban tiredi.