Almaty PD basshysy Qanat Taımerdenov Alataý aýdanynda oryn alǵan atys faktisi boıynsha Qylmystyq kodekstiń eki baby boıynsha tergeý bastalǵanyn aıtty, dep habarlaıdy Egemen.kz.
Polısııa departamentinde ótkizilgen brıfıng barysynda Qanat Taımerdenov bolǵan oqıǵanyń egjeı-tegjeıin aıtyp berdi. Jýrnalıstermen kezdesý basynda ol qaza bolǵandardyń jaqyndaryna kóńil aıtty.
Onyń aıtýynsha, «Kisi óltirý» jáne «Bılik ókiline shabýyl jasaý» baptary boıynsha eki qylmystyq is qozǵaldy. Kúdikti ÝUI-ǵa qamaýǵa alynyp, tergeý jumystary ótkizilýde. Onyń atyna qarý 2008 jyldan beri tirkelgeni belgili boldy. Kúdikti psıhıatrııalyq dıspanserde tirkelmegen.
Vedomstvoaralyq jedel top quryldy, tergeý nátıjeleri boıynsha polısııa aldaǵy ýaqytta tolyq aqparat beredi.
Qaza tapqan polıseılerdiń otbasylaryna kómek kórsetiledi.
Qaza tapqan S. D. 2003 jyldan bastap Ishki ister organdarynda jumys istedi, onyń bes balasy bar.
Al B. polısııada 2004 jyldan beri jumys istep kelgen. Onyń artynda eki balasy qaldy.
Eske sala ketsek, 20 qyrkúıekte Almaty qalasynyń Alataý aýdanynda 54 jastaǵy er adam oq jaýdyrdy. Oqıǵa saldarynan bes adam mert boldy. Olardyń arasynda sot oryndaýshysy, eki polısııa qyzmetkeri jáne eki azamat bar. Azamattardyń biri - úıdiń jańa ıesi ekeni belgili boldy.
Er azamat ustaldy. Kisi óltirgeni úshin ol 20 jylǵa deıin nemese ómir boıyna bas bostandyǵynan aıyrylýy múmkin.