Shyǵys Qazaqstan oblysy Rıdder qalasynda joǵalyp ketken 5 jasar bala tabyldy, dep habarlaıdy Egemen.kz.
ShQO Polısııa departamenti baspasóz qyzmetiniń málimetine súıensek, búgin saǵat 14:00 shamasynda polısııaǵa qońyraý shalǵan áıel adam ulynyń joǵalyp ketkendigin aıtqan.
Belgili bolǵandaı, Matveı esimdi 5 jasar bala úıden aýlaǵa shyǵyp, sol kúıi qaıtyp oralmaǵan. Ata-anasy qansha izdegenderimen ony taba almaǵan.
«Polısııa qyzmetkerleri birden jedel-izdestirý sharalaryna kiristi. Balany tabý úshin volonterler de jumyldyrylǵan. Kóp uzamaı Matveı aýlalardyń birinen aman-esen tabyldy. Qazirgi ýaqytta bala ata-anasyna jetkizildi», dep habarlady vedomstvo ókilderi.