Túrkistan oblysyndaǵy Ushqyn aýylynda bir úıde tórt birdeı adam qaıtys boldy. Olardyń arasynda jas bala da bar. Bul týraly oblystyq Tótenshe jaǵdaılar departamenti málimdedi, dep habarlaıdy Egemen.kz.
Departament málimetine súıensek, qaıǵyly oqıǵa 28 qarasha kúni bolǵan. Kúndiz saǵat 12:30-dyń shamasynda jergilikti turǵyndar jeke menshik úıde tórt adamnyń qaıtys bolǵanyn habarlady. Eki er adam, bir áıel jáne 3-4 jasar bala.
Oqıǵa ornyna barǵan qutqarýshylar qaıǵyly jaǵdaıdyń aldyn ala sebebin anyqtady. Tórt adam da ıis tıip ýlanǵan. Úıdiń ıesi eski peshti buzyp, tabıǵı gazben jaǵatyndaı etip qaıta salǵan.
«Iis gazdy «únsiz jan alǵysh» dep ataıdy. Sebebi kózge kórinbeıdi, ıisi de joq. Adam onymen birneshe ret dem alsa, ólip ketýi múmkin. Ol qanǵa barǵannan keıin aǵzaǵa ottegi taratatyn gemoglabındi buǵattap tastaıdy. Sodan adam ıis tıis ýlanady», deıdi qutqarýshylar.
Aýada ıis gazynyń mólsheri 0,1% bolsa, adam bir saǵat ishinde qaıtys bolady. Al 0,5%-ke artqan jaǵdaıda 20 mınýtta ólimge ákep soǵady.