Ishki ister mınıstrliginiń jeke turǵyn úı qory joq, sondyqtan turǵyn úıge muqtaj qyzmetkerlerdi qamtamasyz etý máselesi árdaıym ózekti, dep jazady Egemen.kz.
2014 jyly ishki ister organdary qyzmetkerleriniń belgili bir sanatyna turǵyn úıdi jaldaýǵa (jalǵa alýǵa) arnalǵan ótemaqy tólemderi quqyǵy berildi. Bastapqy kezeńde 6 myńnan astam polısııa qyzmetkeri osy quqyqqa ıe boldy. 2019 jyly tizim patrýldik polısııa laýazymdarymen jáne ýchaskelik ınspektorlarmen (onyń ishinde kámeletke tolmaǵandar isteri boıynsha) tolyqtyryldy. Sol kezdegi qyzmetkerlerdiń jalpy sany 9 myńnan astam adamdy qurady. Bıyl 1 qańtardan bastap turǵyn úı tólemderin alýǵa quqyǵy bar laýazymdar tizimin ýchaskelik polısııa ınspektorlarynyń kómekshileri, arnaıy mekemeler men aıdaýyl qyzmetiniń, Mamandandyrylǵan kúzet jáne kınologııalyq bólimshelerdiń, qylmystyq-atqarý júıesi sottalǵandarynyń medısınalyq bólimsheleri men eńbekti uıymdastyrý bólimsheleriniń, kezekshi bólimderdiń jáne jedel basqarý ortalyqtary qyzmetkerleri tolyqtyrdy. Osylaısha, turǵyn úıge muqtaj polıseıler sany taǵy 8364 birlikke ulǵaıtyldy. Qazirgi ýaqytta bul san 27,5 myń qyzmetkerge deıin ósti.
2021 jylǵy 1 sáýirde Memleket basshysy zań qabyldady, oǵan sáıkes IIO qyzmetkerleri úshin turǵyn úı tólemderiniń tetigi áskerı qyzmetshilermen uqsas belgilendi. Bul tetik boıynsha qyzmettik mindetterin oryndaý kezinde qaza tapqan jáne jaraqat alǵan qyzmetkerlerdiń otbasylaryna tólemderdi saqtaý jónindegi zańnamalyq norma kózdelgen.
– Qazirgi ýaqytta turǵyn úıge muqtaj polısııa qyzmetkerleriniń 70%-dan astamy osyndaı tólemdermen qamtamasyz etilgen. Qazir «Otbasy Banki» basqarmasymen ekijaqty kelisim jasasý máselesi pysyqtalýda, bul polıseılerge banktiń arnaıy turǵyn úı baǵdarlamalaryna qatysýǵa jáne olar úshin qolaıly sharttarmen turǵyn úı alýǵa múmkindik beredi, – dep habarlady QR Ishki ister mınıstriniń orynbasary Murat Baımuqashev.