Soltústik Qazaqstan oblysynda er adam ınternet-alaıaqtarǵa úsh mln teńge berip, aldandy, dep habarlaıdy Egemen.kz.
Petropavl turǵyny Instagram áleýmettik jelisinde ınvestısııa arqyly ońaı tabys tabýǵa qatysty aqparatty kórip, usynylǵan silteme boıynsha saıtqa tirkelgen. Kóp keshikpeı brokerlik saıttyń ókilderimiz degen tulǵalar WhatsApp messendjeri arqyly baılanysqa shyǵady.
Alaıaqtardyń nusqaýlary boıynsha er adam 65 myń teńgesin olar aıtqan esepshotqa aýdarady. Birazdan soń saıttaǵy jeke kabınetine tabysynyń eselengeni jóninde aqparat keledi. Jeńil aqshaǵa qyzyqqan turǵyn eki bankten mıllıon teńgeden nesıe, tanysynan 850 myń teńge qaryz alyp, barlyq qarjysyn «ınvestısııaǵa salady». Osydan keıin «menedjerler» baılanysqa shyqpaı qoıady. Er adam saıttaǵy shottan qarajatyn qaıtara almaı otyr. 3 mln teńgege jýyq aqshaǵa alaıaqtarǵa aldanǵan azamat polısııaǵa júgindi.
«Oblysta jyl basynan «aqshasyn kóbeıtýge» qatysty ınternet-alaıaqtyqtyń 17 faktisi tirkeldi. Keıde kúmándi ınvestısııalardan mol tabys tabýǵa jábirlenýshilerdiń tanystary tartady, keı jaǵdaılarda alaıaqtar qashyqtan arbaıdy: brokerlik saıttardyń mekenjaılaryna uqsas kóshirme saıttar quryp, adamdardy áleýmettik jeli arqyly tartady. Qýlyqtyń mundaı túri barlyq elderde kezdesedi. Aldanǵandardyń aýdarǵan aqshalary kıberqylmyskerlerdiń qaltalaryna túsedi. Internette saq bolýǵa, ońaı oljaǵa senbeýge, kúmándi siltemeler boıynsha ótpeýge keńes beremiz», dep habarlaıdy SQO PD Krımınaldyq polısııa basqarmasynyń bastyǵy Marat Jumalıev.