Memleket basshysy Qasym-Jomart Toqaevtyń tapsyrmasy boıynsha QR Premer-Mınıstri Álıhan Smaıylov pen QR Prezıdenti Ákimshiliginiń basshysy Murat Nurtileý jumys saparymen Jambyl oblysyna baryp, oblystyq máslıhattyń kezekten tys sessııasyna qatysty, dep habarlaıdy Egemen.kz.
Úkimet basshysy máslıhat depýtattaryna Jambyl oblysynyń ákimi laýazymyna Nurjan Nurjigitovti taǵaıyndaý týraly Qazaqstan Respýblıkasy Prezıdentiniń usynys-hatyn oqyp berdi. Depýtattar usynylǵan kandıdatýrany biraýyzdan maquldady.
Oblys aktıvimen ótken kezdesýde QR Premer-Mınıstri Berdibek Saparbaevtyń oblystyń damýyna, ultaralyq kelisimdi nyǵaıtýǵa, halyqtyń ál-aýqaty men turmys sapasyn arttyrýǵa qosqan úlesine toqtalyp, óńir basshysy qyzmetinde atqarǵan jumysy úshin alǵys aıtty.
«Berdibek Mashbekuly eki jyldan astam ýaqyt ishinde birqatar mańyzdy jobalardy iske asyryp, Jambyl oblysy áleýmettik-ekonomıkalyq damý kórsetkishteri boıynsha jaqsy nátıjelerge qol jetkizdi. Berdibek Saparbaev memleketimizdiń irgetasyn qalaǵan tulǵalardyń biri. Halyqqa qyzmet etýdiń shynaıy úlgisin kórsetken syıly azamat. Memleket basshysynyń jáne jeke ózimniń atymnan Sizge kópjyldyq qajyrly eńbegińiz úshin zor alǵysymdy bildiremin!» dedi Á. Smaıylov.
Oblystyń jańa ákimin tanystyrý barysynda Álıhan Smaıylov Nurjan Nurjigitovtiń jaýapty basshylyq laýazymdarda atqarǵan úlken jumys tájirıbesin atap ótti.
Úkimet basshysy óńir basshylyǵy aldyna Jańa Qazaqstandy qurý strategııasyn iske asyrý aıasyndaǵy mindetterdi belgilep, halyqtyń áleýmettik-ekonomıkalyq máselelerin jedel sheshýdiń mańyzdylyǵyna toqtaldy.
«Memleket basshysynyń Qazaqstan halqyna arnaǵan Joldaýynda alǵa qoıylǵan mindetterdi, ásirese, el turǵyndarynyń ál-aýqatyn arttyrý baǵytyn oryndaý boıynsha belsendi jumys atqarý qajet. Sonymen qatar oblystyń ónerkásip, aýyl sharýashylyǵy salalaryn odan ári damytyp, jańa jumys oryndaryn qurý, shaǵyn jáne orta bıznesti qoldaý, ınvestısııa tartý boıynsha aýqymdy jumystardy sapaly uıymdastyrý qajet. Oblysta biraz jınalǵan másele baryn jaqsy bilemiz. Jańa oblys basshylyǵy Úkimetke olardy retteý boıynsha tıisti usynystar engizýi kerek. Nurjan Moldııaruly óńir aldynda turǵan barlyq tapsyrmany oblys aktıvimen birlese otyryp, sapaly aqtarady dep senim bildiremiz», dedi QR Premer-Mınıstri.