2018 jyldan bastap elimizdiń 39 eldi mekenine, sonyń ishinde Almaty qalasyna da ǵarysh monıtorıngi júrgizilip keledi. Ǵaryshtyq monıtorıng qala boıynsha qoqys qaldyqtary jınalatyn oryndardy anyqtaýǵa múmkindik beredi, dep habarlaıdy Egemen.kz.
Geoservıs qoqystyń ornyn, túrin, ýaqytyn anyqtap, mamandar tıisti túsinikteme engize alady.
Aıta ketsek, ótken jyly atalǵan geoportaldyń kómegimen 17 qoqys úıindisi tirkelgen, al osy jyldyń basynan beri Túrksib jáne Medeý aýdandarynda 10 stıhııaly qoqys orny anyqtalǵan.
Jergilikti ákimdikter anyqtalǵan aýmaqtarda tazalaý jumystary júrgizilip jatqanyn habarlady. Qoqys oryndaryn anyqtaý úshin qala ákimdigi ekologııa departamenti, mamandandyrylǵan tabıǵatty qorǵaý prokýratýrasy, aýdan ákimdikteri men «Medeý» memlekettik óńirlik tabıǵı saıabaǵy mamandarynan jasaqtalǵan arnaıy jumys tobyn qurdy.
Jyl basynan beri jumys toby 37 stıhııaly qoqys ornyn anyqtaı aldy. Nátıjesinde, onyń 32-si joıyldy, qalǵan 5 orynda tazalaý jumystary júrgizilip jatyr.