«Astana Balet» teatry toǵyzynshy maýsymyn bas dırıjer Arman Orazǵalıevtyń jetekshiligindegi sımfonııalyq orkestrdiń súıemeldeýimen ótken «Orfeı men Evrıdıka» bir aktili baletiniń premerasymen aıaqtady, dep habarlaıdy Egemen.kz teatrdyń baspasóz qyzmetine silteme jasap.
Spektakldi horeograf Krıstına Polın qoıǵan bolatyn. 5-6 jáne 8-9 shildede ótken premeralyq kórsetilim barysynda, teatrdyń jańa týyndysyna tánti bolǵan kórermen zor qoshemetin bildirdi.
Premerany Mádenıet jáne sport mınıstri Dáýren Abaev ta tamashalady.
«Men úshin sahnadaǵy áreket – shyǵarmashylyq qııaldyń jemisi. Men óz qoıylymdaryma grek mıfologııasynyń keıipkerlerin qosýdy unatamyn. Áıtse de, mıftiń mazmunyn, sonymen qatar, keıipkerlerdiń minez-qulqyn sál-pál ózgertemin. Men úshin eń bastysy, spektakl mazmunyn bıshilerdiń qımylymen jetkize bilý. Iаǵnı, kostıým, dekorasııa, ózge de sahnalyq bezendirýdi meılinshe az qoldanýǵa tyrysamyn. Eń mańyzdysy – bı arqyly kóńil-kúı yrǵaǵyn jetkizý», degen oıymen bólisti qoıýshy-horeograf Krıstına Polın.
«Orfeı men Evrıdıka» baleti sazdy áýenimen, júrek pernesin sherter psıhologızm ári mýzyka men bıdiń úndestigimen erekshelenedi. Qoıylym Sergeı Prokofev, Edýard Ýılıam Elgar, Georg Frıdrıh Gendel, Devıdson Djakonello syndy kompozıtorlardyń ásem áýenderimen súıemeldengen. Kostıýmer Dennıs Peshkeniń sahnalyq kostıýmderinde osy mıftiń sımvolıkasy kórinis tapsa, ssenograf Otto Býbenıchektiń dekorasııasynda taýǵa uqsaıtyn birkelki emes, aınaly geometrııalyq keskinder qoldanyldy.
Degenmen, eń bastysy, horeografııa men astanalyq teatr ártisteriniń sheberligi. Orfeıdiń rólin jetekshi solıst Súndet Sultanov pen birinshi solıst Ýeslı Karvalo, mýza ári Orfeıdiń súıiktisin jetekshi solıst Aınur Ábilǵazına men Tatıana Ten, al, ortanqol jazýshy Arısteıdiń beınesin daryndy bıshiler Erqanat Ermaǵambet pen Eldar Sársembaev somdady.
Sonymen qatar jańa qoıylymǵa Ilıa Manaenkov, Nazerke Aımuhametova, Darına Qaırasheva, Baıqadam Túnǵatarov, Artýr Edson, Natalıa Fernandes-Menes, Ańsaǵan Kóbentaı, Anar Dúkıeva, Aqqalı Turǵalı, Nurzat Berikqazyuly jáne Serik Amanjol syndy teatr ártisteri qatysty.
Keshtiń ekinshi bóliminde astanalyq kórermen nazaryna usynylǵan cheh fálsafashy-horeografy Irjı Kılıannyń «Joldan taıǵandar» atty baleti de sımfonııalyq orkestrdiń urmaly aspaptar tobynyń súıemeldeýimen oryndaldy. Kılıan horeografııasy men Stıven Raıhtyń daýylpaz kompozısııasynyń shyǵarmashylyq úndestiginiń jemisi – sahnadaǵy segiz balerınanyń qalyqtaǵan qımylynan-aq bilinip otyrdy. Horeoraftyń týyndysy áýezdiligimen, monohromdy estetıka jáne oryndaýshylyqtyń álemdik deńgeıimen erekshelenedi.
«Bıylǵy teatr maýsymy gastroldik saparlar jaǵynan da, túrli jobalar jaǵynan da óte mazmundy boldy. Premeralyq qoıylymdar, sonymen qatar, repertýardaǵy úzdik spektaklder kórermen nazaryna usynyldy. «Orfeı men Evrıdıka» baletiniń premerasy da oıdaǵydaı ótti. Kórermen zor yqylasyn, qoshemetin bildirdi. Teatr súıer qaýymnyń arqasynda bizdiń de tynysymyz ashylyp, tyń dúnıeler shyǵarýǵa talpynyp, shabytqa bólenip, súıikti kórermenderimizben qaıta qaýyshý úshin aldaǵy teatr maýsymyn asyǵa kútemiz», dedi teatr dırektory Aleksandr Sovostıanov.
Astana kúnine oraılastyrylǵan premera Qazaqstan Respýblıkasy Mádenıet jáne sport mınıstrliginiń qoldaýymen júzege asyryldy.