Jeksenbi kúni keshke Latvııa jaǵalaýynda jekemenshik Cessna ushaǵy teńizge qulady, dep habarlaıdy Egemen.kz.
Buǵan deıin túsiniksiz baǵytta ushyp bara jatqan áýe kóliginiń jaı-japsaryn anyqtaý úshin NATO óz ushaqtaryn da kókke kótergen edi.
FlightRadar24 habarlaýynsha, Aýstrııada tirkelgen Cessna 551 ushaǵy Ispanııanyń ońtústigindegi Heres qalasynyń belgisiz núktesinen áýe keńistigine kóterilgen.
Ushaq Parıj ben Keln mańynda eki ret baǵytyn ózgertken. Ekinshi márte Shvesııanyń Gotland aralynyń janynan Baltyq teńiziniń ústinen ushyp ótken. Jergilikti ýaqyt boıynsha saǵat 17:37-de ushaq radardan joǵalyp ketken.
Nemis jáne Danııanyń áskerı ushaqtary ózderiniń áýe keńistiginen ótip bara jatqan Cessna-ny baqylaý kezinde onymen baılanys ornata almaǵan.
Nemistiń Bild gazeti ushaqta barlyǵy 4 adam bolǵan degen boljam aıtyp otyr.
Latvııanyń ótinishi boıynsha izdestirý-qutqarý jumystaryn júrgizý úshin Lıtva áýe kúshteriniń tikushaǵy apat ornyna jiberildi. Al Latvııa tarapy apat ornyna kemelerin jiberdi.