Bul týraly Prezıdent Qasym-Jomart Toqaev Respýblıka kúnine oraı memlekettik nagradalar men syılyqtar tapsyrýǵa arnalǵan saltanatty rásimde aıtty, dep habarlaıdy Egemen.kz.
«Egemen el bolý ońaı emes, biraq eldikti saqtap qalý odan da qıyn. Biz qasterli táýelsizdigimizdiń tuǵyryn nyǵaıta túsýge tıispiz. Sondaı-aq, elimizdiń ósip-órkendeýi jolyndaǵy kederginiń bárinen arylýymyz kerek. Odan ári damý úshin jańa strategııalyq baǵdarymyzdy aıqyndaý mańyzdy», dedi Prezıdent.
Prezıdenttiń aıtýynsha, sońǵy jyldary túrli salada túbegeıli reformalar qolǵa alyndy.
«Memlekettigimizdiń jańa dáýiri bastaldy. Maqsatymyz – Ádiletti Qazaqstandy qurý. Qazir biz osy kúrdeli joldyń basynda turmyz. Men úshin halyqtyń jáne memlekettiń múddesi bárinen bıik. Sol sebepti, men osy strategııalyq baǵytty elimizdiń basty baǵdary retinde jarııaladym. Bul joldaǵy barlyq jaýapkershilik júgin arqalaýǵa daıynmyn. Biz aýqymdy konstıtýsııalyq reforma júrgizip, elimizdi túbegeıli qaıta qurýǵa kiristik», dedi Q.Toqaev.
Sondaı-aq ol «Kúshti Prezıdent – yqpaldy Parlament – esep beretin Úkimet» qaǵıdasy ornyǵatynyn aıtty.
«Elimizdiń jańa ekonomıkalyq saıasatynyń negizgi maqsaty – barsha azamattarymyzdyń ál-aýqatyn qamtamasyz etý bolmaq. Budan bylaı qoldan jasalǵan barlyq monopolııalar kelmeske ketedi», dep atap ótti Memleket basshysy.