Tashkentte ótip jatqan bokstan álem chempıonatynda Qamshybek Qońqabaev jarys sapynan shyǵyp qalǵan edi. О́ziniń jeńilisi týraly qazaqstandyq sportshy Instagram paraqshasynda pikir bildirdi, dep habarlaıdy Egemen.kz.
«Bizge árdaıym qoldaý kórsetip, taqymdaryńyzdy qysyp naǵyz jankúıer bolǵandaryńyz úshin alǵys aıtqym keledi. Sport bolǵan soń jeńis pen jeńilis qatar júredi. Sharshy alańǵa tek jeńis úshin shaıqasýǵa kóterilemiz. Qandaı nátıje bolsa da sizderdiń qoldaýlaryńyz biz úshin mańyzdy. Buıyrsa áli-aq san márte kók baıraqty jelbiretetinime senemin jáne sol jolda aıanbaı eńbek etemiz. Jartylaı fınalǵa joldama alǵan batyrlarymyzǵa jeńis tileımin. Alǵa Qazaqstan!», dep jazdy boksshy.
Aıta keteıik, asa aýyr salmaqta el namysyn qorǵaǵan otandyq boksshy shırek fınalda О́zbekstannyń ataqty boksshysy Bahodır Djalolovpen judyryqtasqan edi. Tartysty ótken kezdesýde tóreshilerdiń sheshimimen ózbek bylǵary qolǵap sheberi jeńiske jetti.