Birshama ýaqyt buryn Memleket basshysy Qasym-Jomart Toqaev elimizde sheteldik joǵary oqý oryndarynyń fılıalyn ashý týraly tapsyrma bergen bolatyn. Prezıdent bul qadam Qazaqstanda ǵylymı ekojúıeni ulttyq bilim jáne ǵylym júıesine engizýge múmkindik beretinin de atap ótken edi.
Prezıdent tasyrmasyna áýlıeatalyqtar myqtap den qoıdy. Jyl basynda M.H.Dýlatı atyndaǵy Taraz óńirlik ýnıversıteti men «Qazfosfat» JShS jáne D.Mendeleev atyndaǵy Reseı hımııa-tehnologııalyq ýnıversıteti úshjaqty kelisimge qol qoıdy. Nátıjesinde, óńirlik ýnıversıtte TMD elderi arasynda alǵash ret hımııa ónerkásibi salasyndaǵy jelilik kampýstyń tusaýkeseri ótti.
Oblys ákiminiń orynbasary Erkin Úısimbaev jelilik kampýs arqyly bilikti kadr daıarlaýdyń múmkindigi artatynyna senimdi.
– Jelilik kampýs jumysynyń bastalýy – joǵary bilikti kadrlardy daıarlaý isinde tıimdi dıalogti damytyp, bilim ordasyndaǵy yntymaqtastyqty nyǵaıtýdaǵy mańyzdy kezeń. Zamanaýı, kreatıvti tásilderdi qajet etetin hımııa ónerkásibi búginde qarqyndy damyp kele jatqan sala. Eki ýnıversıtet pen «Qazfosfat» kompanııasynyń birlesken jumysy aýyz toltyryp aıtarlyqtaı nátıje beretinine senimdimin. Búginde oblys basshysy atalǵan jobany júzege asyrýǵa aıryqsha nazar aýdaryp otyr. Kelesi oqý jylynda jergilikti bıýdjet qarajaty esebinen 55 bilim granty bólinedi, onyń 25-i kolledj stýdentteri úshin «Hımııalyq ınjenerııa jáne úderister» mamandyǵyna beriledi», – dedi E.Úısimbaev.
О́ńirlik ýnıversıtetiniń rektory Muhtar Baıjumanovtyń aıtýynsha, jelilik kampýs arqyly kadr daıarlaý isindegi ózekti máseleler ýaqtyly sheshimin tappaq.
– Úsh taraptyń birlese atqarǵan jumysy jańa ıdeıalardy iske asyrýǵa múmkindik týdyryp, hımııa ǵylymynyń damýyna serpin beretinine esh kúmánim joq. Hımııa ónerkásibi úshin ǵylym men óndiristi sapaly ári jańa deńgeıge kóteretin aqyldy, kreatıvti jáne órshil mamandar qajet ekeni ras. Jelilik kampýs aıasynda stýdentter alǵashqy eki jylda jergilikti ýnıversıtette oqysa, odan keıin Mendeleev ýnıversıtetinde bilim alyp, kásibı sheberligin arttyrady. Al tórtinshi kýrsta «Qazfosfat» kásipornynda óndiristik tájirıbeden ótedi. Oqý aıaqtalǵannan keıin stýdentter eki ýnıversıtettiń dıplomyna jáne «Qazfosfat» seriktestigine jumysqa ornalasý múmkindigine ıe bolady, – dedi M.Baıjumanov.
«Qazfosfat» kompanııasy personalmen jumys departamentiniń dırektory Ábdinádir Aıtmatovtyń aıtýynsha, kásiporyn qyzmetkerleriniń sany aldaǵy jyldary edáýir artady. Al úshjaqty kelisim arqyly bilim alǵan stýdentter seriktestikke jumysqa qabyldanady. Olardyń jalaqysy da qomaqty bolmaq.
D.Mendeleev atyndaǵy Reseı hımııa-tehnologııalyq ýnıversıtetiniń fızıka-hımııa kafedrasynyń meńgerýshisi, hımııa ǵylymdarynyń kandıdaty Oleg Raıtmannyń sózine sensek, jelilik bilim baǵdarlamasy boıynsha oqýdy tańdaǵan stýdentterdiń múmkindigi mol. Olar oqýdy aıaqtaǵannan keıin jumys ornyna daıyn kadr bop barady.
Mamandardyń aıtýynsha, aldaǵy jyldary «Qazfosfat» kompanııasynda kadr qajettiligi týyndaıdy. Al jelilik kampýs arqyly bilim alǵan stýdentter sol kadr tapshylyǵyn tolyǵymen óteıdi. Qysqasy, qalaı alyp qarsaq ta, TMD-da alǵash ret qolǵa alynǵan jelilik kampýstyń óńir halqy úshin paıdasy zor ekeni daýsyz.
TARAZ