Elordadaǵy Beıbitshilik jáne kelisim saraıynda Halyqaralyq volonterler forýmy ótip jatyr. Onda Tótenshe jaǵdaılar mınıstri Syrym Sháriphanov Abaı oblysyndaǵy órt kezinde kómektesken eriktiler týraly aıtty, dep habarlaıdy Egemen.kz.
Ekinshi sessııada Tótenshe jaǵdaılar mınıstri Syrym Sháriphanov, «Volonterlik qozǵalys LIDER.KZ» qoǵamdyq birlestiginiń jetekshisi Dılmıra Blas, Ortalyq Azııadaǵy Halyqaralyq Qyzyl Krest jáne Qyzyl Jarty Aı qoǵamdary federasııasynyń ókildiginiń basshysy Seval Gýzelkılınch, «Ulttyq volonterler jelisi» Atqarýshy dırektory Tatıana Mıronıýk, Eýropa jáne TMD elderi boıynsha aımaqtyq menedjer, BUU eriktisi Rımma Sabaeva sóz sóıledi.
Sessııa basynda Tótenshe jaǵdaılar mınıstri Abaı oblysyndaǵy qaza tapqandardyń qurmetine bir mınýttyq únsizdik jarııalady.
«Eriktilerdiń abzal jumysy Qazaqstan úshin jańashyldyq emes. Bir-birimizge qorǵan bolyp, qoldaý kórsetý qazaq halqynyń qanynda bar. Bunyń myńdaǵan jyldyq tarıhy da bar. Jýyrda Abaı oblysynda alapat órt bolǵany barshaǵa belgili. Osynaý qıyn-qystaý kezeńde halqymyz birigip, qaıtys bolǵan azamattardyń jaqyndaryna, zardap shekken adamdarǵa qoldaý kórsetkender - eriktiler. Olardyń qaıyrymdylyq isterin erekshe atap ótý kerek. Ár óńirden gýmanıtarlyq kómek jınalyp, qarjylaı bolsyn, moraldyq turǵydan bolsyn qoldaý kórsetildi. Memleket basshysynyń bastamasymen orman órti saldarynan kóz jumǵan azamattardyń erligi elendi, balalaryna qoldaý kórsetildi. Osynyń barlyǵyna eriktiler mańyzdy úles qosty. Qazaqstan eriktileri - naǵyz patrıottar», dedi Tótenshe jaǵjaılar mınıstri.