Astana tórinde ótip jatqan Halyqaralyq eriktiler forýmyna álemdik sarapshylar qatysyp, eriktilerdiń qoǵamdaǵy róli jaıly sóz qozǵady, dep habarlaıdy Egemen.kz.
20-21 maýsym aralyǵynda ótetin Halyqaralyq eriktiler forýmnyń negizgi maqsaty – volonterlik qozǵalysty damytý jáne qoldaý salasyndaǵy qazaqstandyq tájirıbeni halyqaralyq deńgeıde pash etý.
Osy tusta is-shara týraly qyzyqty ári mańyzdy derek jaıly aıta ketsek, forýmnyń sımvoly «meıirimdilik genin» beıneleıtin DNQ fragmenti boldy. Sebebi DNQ jynysyna, jasyna, ultyna jáne basqa da erekshelikterine qaramastan barlyq adamdarǵa birdeı tán. Bul planetamyzdaǵy ár adam bir-birine birdeı meıirimdi bolyp, tek izgi amaldardy isteý qajet ekenin bildiredi.
Forým aıasynda halyqaralyq volonterlik uıymdardyń qyzmeti, azamattyq bastamalardy qoldaýdaǵy korporatıvtik jaýapkershiliktiń róli, ekologııadaǵy, bilim berýdegi, densaýlyq saqtaýdaǵy jáne tótenshe jaǵdaılardaǵy volonterlik taqyryptar keńinen talqylandy.
Mańyzdy is-sharadan tysqary qalmaı, at basyn Astanaǵa buryp kelgen halyqaralyq sarapshylar men álemniń eń bedeldi uıymdarynyń músheleri de pikirlerin ortaǵa saldy.
Máselen, BUU-nyń Qazaqstan Respýblıkasyndaǵy turaqty úılestirýshisi Mıkaela Frıberg-Storı volonterlik qyzmettiń mańyzdylyǵyna toqtaldy.
«Qaı jerde volonter bolyp qyzmet etip, kimge járdem berseńiz de – onyń mańyzy zor. Meıli, bul Afrıka bolsyn, kórshi úıdiń balasy bolsyn, eriktiler kez-kelgen muqtaj janǵa meıirimdi bolýy kerek. Búginde qarapaıym adamdar volonter bolý arqyly qoǵamnyń damýyna zor úles qosyp otyr. Taza peıil men ıgi ister adamǵa qýanysh syılap, ómirdiń kez-kelgen salasynda jetistikke jeteleıdi», dedi Mıkaela Frıberg-Storı.