Búgin Memleket basshysy Qasym-Jomart Toqaev Ishki ister mınıstrliginiń alqa májilisin ótkizdi, dep habarlaıdy Egemen.kz.
«Barshańyzǵa málim, Ishki ister mınıstrligi – memlekettik basqarý júıesinde aıryqsha ról atqaratyn qurylym. Qoǵamdyq tártipti saqtaý, qylmyspen kúresý – asa mańyzdy mindet. Azamattardyń jáne búkil memlekettiń qaýipsizdigi osy mindetterge tikeleı baılanysty.
Tártip saqshylarynyń qyzmeti ońaı emes. Kúni-túni jumys isteıtin kezder jıi bolady. Qaýip-qater de bar. Táýlik boıy, ıaǵnı 24 saǵat boıy saqadaı saı bolý úshin erekshe qajyr-qaırat pen tózimdilik qajet. Sebebi qıyn jaǵdaıǵa tap bolǵan jandar, eń aldymen, polısııadan kómek kútedi. Azamattarymyz sizderge memlekettiń, ıaǵnı bıliktiń ókili retinde qaraıdy. Qaýip-qaterden qorǵaıdy dep senedi. Sondyqtan sizderge árdaıym orasan zor jaýapkershilik júkteledi», dedi Prezıdent.
Budan soń ol polısııa qyzmetkerlerine qoldaý kórsetiletinin aıtty.
«Jalpy polısııanyń sapaly jumysy el úshin, halyq úshin óte qajet. Biz bárimiz, birtutas qoǵam bolyp polısııa qyzmetkerlerine jan-jaqty qoldaý kórsetýimiz qajet. Dál osyndaı qoldaýdy biz mindetti túrde kórsetemiz. Polısııa qoǵamda halyqtyń qurmetine ıe mamandyqtyń biri bolýy kerek. Al polısııa qyzmetkerleri, eń aldymen, óz eline, halqyna adal qyzmet etýge tıis. Sondyqtan biz qazir ishki ister organdarynyń jumysyn jetildirýge basa mán berip otyrmyz», dedi Memleket basshysy.