Premer-mınıstr Álıhan Smaıylov ortalyq memlekettik organdar, Bas prokýratýra, BQDA, QMA jáne basqa da vedomstvolar basshylarynyń qatysýymen Ekonomıkany demonopolızasııalaý jónindegi komıssııanyń kezekti otyrysyn ótkizdi, dep habarlaıdy Egemen.kz Úkimettiń baspasóz qyzmetine silteme jasap.
Jıynda joǵary bilim salasyndaǵy buryn jeke menshikke ótken keıbir aktıvterdi memleket menshigine qaıtarý máselesi talqylandy.
Premer-mınıstr quzyrly memlekettik organdarǵa tıisti qujattar men sharttardy tekserip, olardyń zańdylyǵyna quqyqtyq baǵa berýdi tapsyrdy. Bul rette Álıhan Smaıylov atalǵan oqý oryndaryndaǵy oqý prosesiniń tolyq turaqtylyǵyn qamtamasyz etý qajettiligine toqtaldy, óıtkeni bastalǵan tekserý stýdentterge de, ýnıversıtet qyzmetkerlerine de qatysty emes.
Keńeste Qaraǵandy oblysynyń 30-ǵa jýyq eldi mekenin elektr qýatymen qamtamasyz etip otyrǵan jekemenshik energetıkalyq kompanııanyń jumysy da qaraldy.
Kásiporyn menshigindegi elektr jelileriniń ábden tozyǵy jetkeni atap ótildi. Osy rette jóndeý jumystary júrgizilmeıdi ári apattyq brıgadalar tapshy. Jalpy tekserý barysynda anyqtalǵan buzýshylyqtar joıylmaǵan. Osyǵan baılanysty jergilikti turǵyndar elektr qýatynyń jıi sebepsiz óship qalýyna, elektr qýatynyń tapshylyǵyna, keri baılanystyń tolyq bolmaýyna jáne taǵy basqa máseleler boıynsha shaǵymdanyp otyr.
Álıhan Smaıylov kásiporynǵa qatysty jınalǵan materıaldardy taldaý jáne qalyptasqan jaǵdaıǵa quqyqtyq baǵa berý úshin Bas prokýratýraǵa berýdi tapsyrdy.
Sondaı-aq keńes barysynda temirjol kóligi salasynda da birqatar monopolııaǵa qarsy sharalardy júzege asyrý máselesi qaraldy.