Aqtóbeden uzaq jolǵa shyqqan ardager veloshabandoz Arqaǵa keldi. Bar ǵumyryn temirjol boıynda ótkizgen Jumabaı Otarǵalıev elimizdi aralap júr. Velosıpedti taqymdaǵanyna alty jyl bolypty. Sodan beri 20 myń shaqyrymnan asa jol júrip ótken. Zeınetke shyǵa salysymen velosıped alyp, qurmetti eńbek demalysynda el aralap, jer kórýdi maqsaty etken Jumabaı aqsaqaldyń jasy 75-te.
Aqsaqal óziniń jasy týraly: «Men – 69-dan endi astym» dep ázildeıdi. Ardager veloshabandoz elimizdiń birshama bóligin velosıpedpen júrip ótipti. Qudaı qýat berse, nebári eki aıdyń ishinde búkil el aýmaǵyn aralaımyn dep otyr.
– Men shamamen osy joly 6 myń shaqyrymdy basyp óttim. Oral, Aqtóbe, Jezqazǵan, Qyzylorda, Túrkistan, Taraz, О́skemen, Semeı qalalarynda boldym. Endi Qaraǵandydan keıin Astana, Kókshetaý, Petropavl, Qostanaı, Aqtóbe qalalaryna baryp, sapardy Atyraýmen aıaqtaımyn dep oılap otyrmyn. Kúnine qansha shaqyrym júrip ótetinimdi dál aıtý qıyn. Meniń mejem – jergilikti temirjol stansalary. Bir temirjol stansasynan ekinshisine jalǵaıtyn joldy qadaǵalaımyn, – deıdi J.Otarǵalıev.
Bul jolǵy saparyn veloshabandoz Beıbarys sultannyń – 800, Astana qalasynyń – 25 jyldyǵyna arnapty.
– 2017 jyly alǵash ret velosıpedpen Shalqardan Aqtóbege deıin bardym. Bul, shamamen, 350 shaqyrym. Ol aralyqty men 4-5 kúnde júrip óttim. 2018 jyly Aqtóbeden shyǵyp, Atyraýǵa bardym. Kólikterdi unatpaımyn. Qaıda barsam da, meniń negizgi tulparym, aınymas serigim – velosıped. Men oǵan energııadan ózge eshteńe jumsamaımyn. Motorly kólik satyp alsań, onyń mashaqaty kóp, maıyn aýystyrý kerek degendeı. Shyǵyny da az emes. Endi aldaǵy saparym – Jambyl dalasy. Ondaǵy mıssııamdy Shý – Moıyntynyń qosylǵanyna 70 jyl tolýyna arnaǵym keledi, – deıdi qarııa. Sóıtip, endigi baǵytyn Taraz – Túrkisib, Shý – Saryshaǵan, Moıynty baǵyty boıynsha ózgertetinin aıtty.
Jumabaı aqsaqal Aqtóbedegi «Velo pulse» velokomandasyna qosylyp, olarmen birge qala boıynsha túrli sharalarǵa qatysyp, saıahat ta jasaıdy. Arqaǵa at basyn tiregen aqsaqaldy oblystyq dene shynyqtyrý jáne sport basqarmasy qurmetpen kútip alyp, sát sapar tilep shyǵaryp saldy.
Qaraǵandy oblysy