Jańa avtobýstar jolǵa shyqty

«59 jańa avtobýs satyp aldyq. Olar klımatty baqylaý, beıne­ba­qy­laý júıelerimen jáne aqyldy ka­mera­larmen jabdyqtalǵan. Mysaly, eger júrgizýshi sharshasa, qalǵyp ketse, temeki shekse nemese telefonmen sóılesse, bul kameralar bárin túsirip, ereje talaby buzylǵany týraly belgi beredi. Osylaısha, naqty ýaqyt rejiminde barlyǵyn qada­ǵalap otyrýǵa tehnıkalyq múm­kindigimiz bar», deıdi №5 avtobýs parkiniń bas dırektory Nurlan Elshibaev.

Sonymen qatar avtobýstar jyl­dam­­dyqty shekteıtin datchıktermen, júrip-turýy qıyn jolaýshylarǵa arnalǵan kótergishtermen jabdyq­tal­ǵan. Olardyń klırensi joǵary, júrgizýshige qońyraý shalý túımesi bar. Avtobýstar «Eýro-5» eko­lo­gııa­lyq standarty talaptaryna tolyq jaýap beredi.

Oblys ákimi Ermaǵanbet Bólekpaev avtoparkke arnaıy baryp, ondaǵy bas­shylyqpen kezdesti. Zaýyttan jańa alynǵan avtobýstardy kórdi. Ekin­shi kezektegi mindet qoǵamdyq kó­lik­tiń jumys kestesin uzartý ekenin atap ótti.

«Osymen úshinshi jyl qoǵamdyq kólikti jańartýmen turaqty túrde aınalysyp kelemiz. Onay elektrondy bıletteý júıesin engizdik. Qalalyq marshrýttarda ǵana emes, qala mańyndaǵy marshrýttarda da jol júrýdi eki esege jýyq arzan­da­týǵa múm­kindik jasadyq. 18 jasqa deıingi balalardy tegin jol júretin qyldyq. Endi Prıshahtınsk turǵyndarynyń úıine jetýi úshin avtobýstardyń jumys ýaqytyn 21.00-ge deıin uzartý máselesi ǵana qaldy. Qalaaralyq avtobýstardy da jańartý kózdelgen. Jyl sońyna deıin barlyǵy 33 kólik satyp alamyz, segizi eń suranysqa ıe baǵyttardyń biri «Qaraǵandy – Temirtaý» baǵytyna shyǵady. Jaqyn arada Balqash qalasynyń da avtobýs parki jańarady. №5 avtoparktiń ıe­le­ri sol jerde de jumys isteıdi», dedi ákim.

Qazir avtopark tehnıkalarynyń 80 paıyzy jańartylǵan. Mundaı baǵyt­taǵy jumystar áli jalǵasa beredi.

Qaraǵandy oblysy