Keshe qaraǵandylyq ardagerler Prıozersk qalasyndaǵy «Balqash» shıpajaıyna jolǵa shyqty. Onda ardagerler demalyp, tegin em alady. Mundaı ıgilikti sharýany oblys ákimdigi uıymdastyryp berip otyr. Ardagerler uıymy qurylǵaly alǵash ret shıpajaıǵa joldama alyp otyr.
Bul joly shıpajaıdyń sharapatyn 48 ardager kóredi. On kún em-domdaryn alyp, oı tynyqtyryp taza aýada serýendeıdi. Oblystyq ardagerler keńesi ardagerlerdi tek Qaraǵandydan ǵana emes, aýdan-aýyldan iriktep aldyrypty. Ásirese, áleýmettik jaǵdaıyna qaraı tańdapty.
– Áýeli osyndaı sharaǵa tikeleı bastamashy bolǵan oblys ákimi Ermaǵanbet Bólekpaevqa, atsalysqan oblys ákiminiń orynbasary Baýyrjan Asanovqa, bizbenen bir aı tyǵyz jumys jasaǵan oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Ásem Júnispekovaǵa alǵys aıta ketkenim jón bolar. Bizdiń uıym 1987 jyldyń aqpan aıynda quryldy, bıyl 36 jyl tolyp otyr. Osy ýaqyt aralyǵynda ardagerlerimizdiń shıpajaıda tegin demalýyna alǵash ret joldama berildi. Múmkinshilik bolsa, taǵy da jalǵasady. Ár aýdan, qalada ardagerler uıymy bar. Solarǵa tapsyrma bergenbiz. «Úlken kisilerdi iriktep berińizder, jaǵdaıyna qarańyzdar» dep. Sodan 48 ardagerdi aq jol tilep, shyǵaryp saldyq, deıdi oblystyq ardagerler keńesiniń tóraǵasy Oraldy Tóreǵojın.
Shıpajaıǵa jol tartqandardyń arasynda Buqar jyraý aýdanynyń Qurmetti azamaty, tyl ardageri Qanaǵat Jumashuly da bar. Qanaǵat aqsaqal ardagerler uıymynyń mundaı qamqorlyǵyna dán rıza.
– Buqar jyraý aýdanynan eki ardager keldik. Alla qalasa, on kún demalamyz. Balqash kóliniń jaǵasyndaǵy Prıozersk shaharyna alǵash ret bara jatyrmyn. О́te qýanyshtymyz. Basqa óńirdiń aqsaqaldarymen tanysyp, áńgimelesip, sergip qaıtamyz. Jasyratyny joq, aramyzda jalǵyz qalǵan egde jastaǵylar bar. Ásirese, sol kisilerge úlken kómek boldy. Tyl ardagerleri jyl saıyn azaıyp barady. Úlkendi qurmettegenniń joly árqashan ashyq bolady. Sol sebepti, osyndaı múmkindik týdyrǵan oblys ákimdigine jáne Ardagerler uıymyna aıtar alǵysymyz kóp, – deıdi jasy 88-degi qarııa Qanaǵat Jumashuly.
Oblysta 200 myńnan astam zeınetker bar. 3 myńnan asa tyl eńbekkeri tirkelgen. Jastary 80-90 jas aralyǵynda. О́kinishke qaraı, soǵys ardagerleri joqtyń qasy desek te bolady. 13-i ǵana qalypty. Toǵyzy – Qaraǵandyda, úsheýi – Temirtaýda, bireýi – Osakarov aýdanynda.
Sonymen, 48 ardager mingen avtobýs jol-patrýldik polısııa qyzmetiniń bastaýymen jolǵa shyqty. Oń sapar tilep, shyǵaryp salǵan qaýym qadirli qarttarymyzǵa mundaı qamqorlyq áli de jalǵasyn tabady dep tarqasty.
Qaraǵandy oblysy