Túrmede jazasyn ótep jatqandar da kásiporynda jumys istep, jalaqy alady. Qazir tipti, kolledjde oqyp, arnaıy mamandyqty da ıgeredi. Jaqynda Qaraǵandy oblysy jáne Ulytaý oblysy boıynsha Qylmystyq-atqarý júıesi departamentiniń №30 mekemesinde shaǵyn jáne orta bıznes ókilderi úshin ashyq esik kúni ótti. Is-shara mekemeniń kásiporyn aýmaǵyndaǵy óndiristik áleýetti arttyrýdy kózdeıdi. Sol arqyly sottalǵandardy eńbekpen qamtý máselesi oılastyrylǵan.
Árıne, túrmege ońdy-soldy kirip shyǵýdyń reti bolmaǵandyqtan, mekeme basshylyǵy óndiristik aýmaqqa aparmas buryn temir tordaǵy tirshilikpen tanystyrdy. Ashana, kitaphana, kompıýter bólmesi, psıhologpen keńesetin bólme, teologten dáris alatyn bólme jáne arnaıy bir jasaqtyń jaǵdaıymen tanystyryp, aralatty. Túrmeniń óndiristik aýmaǵyna ótkenimizde shaǵyn kórme qoıyldy. Osy aýmaqta óndiriletin, naryqqa shyǵatyn ónimderdi tamashalaı aldyq. Sórege 5 lıtrlik plastıkalyq ydystan bastap, áskerı jabdyq, jýyný bólmesine arnalǵan keramıkalyq ydys, túrli turmystyq buıymdar, jylyjaıda ósirilgen qııar, qyzanaq, sańyraýqulaq qoıylǵan. Taza bylǵarydan tigilgen aıaq-kıim, arnaıy salalyq kıimder de bar. Qurylysqa qajetti materıaldar: kirpish, blokter, shekaraǵa qoldanylatyn sym da osy túrmeniń óndiristik aýmaǵynan shyǵady. Munda tigilgen aıaqkıim suranysqa ıe. Qysqy, kúzgi, jazǵy er men áıelder aıaqkıimi bar. Baǵasy – qoljetimdi.
– Baǵalary 20 myń teńgeden bastalady. Sapasy joǵary bolý úshin taza bylǵarydan tigemiz. Materıaldy Túrkııadan, Reseıden aldyramyz. Internetten aıaqkıimniń kez kelgen úlgisin kórsetseńiz, ólshemińizdi alyp, qalǵanyńyzdaı tigip beremiz. Onlaın da tapsyrys qabyldaımyz. Qazir brend ataýymyzdy oılastyryp jatyrmyz. Sapasy jaqsy bolǵan soń, tapsyrysymyz da kúnnen-kúnge ósip keledi. Jazasyn ótep jatqan 5 adamdy jumyspen qamtyp otyrmyn. Olardyń arasynda buryn aıaqkıim tikkender de bar. Jalaqyny tapsyrystyń kólemine qaraı tóleımiz, – deıdi jeke kásipker Krıstına Elsova.
«Buryn mundaı kásippen aınalysqan soń, bizge aıaq kıim tigý asa qıyndyq týdyrmaıdy. Eńbekaqymyzdy adal alaıyq dep ár etikti sapaly etip tigýge tyrysamyz. Tigilgen aıaqkıim kólemine sáıkes tólenedi. Bastysy, munda ýaqyt ótedi. Qasymda eki etikshi bar», deıdi esimin kórsetpeýdi ótingen jazasyn óteýshi.
Munda rakovına shyǵaratyn shaǵyn seh ta bar. Úsh sottalýshy eńbek etedi. Keramıkadan quıylatyn bul materıalǵa da suranys joǵary eken. Baǵasy da naryqtaǵydan arzan. Biraq kásipkerler basqa mekemege kóshýge májbúr. Sebebi úsh jumyskerin aýystyryp jatyr.
– Negizi, bul jumysty ıgerip ketý ońaı emes. Biz jumyskerlerimizdi bir jylǵa jýyq úırettik. Olar aýysyp bara jatqan mekemege kóshýge týra keledi. Basqalardy qaıtadan úıretýge bir jyl joǵaltqannan góri úırengen mamandarmen jumysty jalǵastyrǵan áldeqaıda tıimdi. Jumys aýqymymyz ulǵaıyp jatyr. О́nimimizdi qurylys materıaldaryn satatyn dúkenderge ótkizemiz. «Kaspi.kz» qosymshasy arqyly da saýdalap jatyrmyz. Endi vanna shyǵarmaqshymyz. Sosyn ózimizdiń brendpen dúkenimizdi ashsaq degen maqsatymyz da bar. Mundaǵy jumyskerlermen jumys isteý óte tıimdi. Keshikpeıdi, suranbaıdy, biryńǵaı jumyspen aınalysady jáne jumystaryna tııanaqty, – deıdi kásipker Nursultan Akenov.
Onymen qosa, 5 lıtrlik plastıkalyq ydysty arnaıy stanokpen óndiredi. Munda tek bir ǵana maman jumys isteıdi. Kúnine álgi stanoktiń kúshimen myń ydys óndiredi. Áli satylymǵa shyǵa qoımaǵan. Qazir túrmeniń qajetin ǵana ótep tur. Sút, sý tasymaldaıdy.
Sańyraýqulaq sehynda da jumys qyzý. Jumyspen qamtylǵan jazasyn óteýshiler arnaıy temperatýrasy bar bólmede ósirilgen sańyraýqulaqtardy sorttap, patentteıdi.
«Eńbek-Qaraǵandy» respýblıkalyq memlekettiń kásiporynnyń №6 ónerkásiptik ýchaskesiniń basshysy Ashat Amanbekov bos turǵan aýmaqtardy da kórsetti. «Shaǵyn jáne orta kásippen aınalysatyn nıettiler bolsa, jer beremiz, bos sehtardy da jalǵa berýge yqtııarmyz. 1 200 gektar jer telimi bar. Eger bıznesi úshin modýldi keshen salamyz dese, ruqsat beremiz. Nátıjesinde, jazasyn ótep jatqandardy eńbekpen qamtýǵa múmkindik kóbeıer edi» deıdi ýchaske basshysy.
Biz barǵan ónerkásiptik aýmaqta 145 sottalýshy eńbek etip, jalaqy alyp otyr. Ashyq esik kúnine arnaıy barǵan oblystyq qoǵamdyq keńes músheleri Danara Smaıl, Bolat Syzdyq mekeme basshylaryna usynys-pikirlerin jetkizdi.
Qaraǵandy oblysy