Darqan dala qalalyqtar úshin dastarqanyn jaıdy. Jylda berekeli kúz ýaǵynda kóp sharýa artynyp-tartynyp aýyldan keledi. Dástúrli ótetin «Aýyl – bereke» atty jármeńke bıyl da jalǵasyn tapty. Alǵashqy jármeńkege barǵan jurttyń qarasy da qalyń. Aýyl dámin saǵynǵandar úshin bul da bolsa, bir toı.
Kún ertemen bastalǵan Qaraǵandynyń Ońtústik-Shyǵys bóligindegi «Global Sity» kópfýnksıonaldy saýda-qoıma kesheni aýmaǵyndaǵy jármeńkege jeti aýdannyń 100-den astam sharýashylyǵy 630 tonna ónim ákeldi. Qanattas qalalardaǵy kásiporyndar da qalys qalmady. Jármeńkede et, sút ónimderi, kartop, kókónister sórege qoıyldy. Baǵa naryqtaǵydan 10-15 paıyzǵa tómen. Kelgen ónimniń basym bóligi – et. Bul qaladaǵylar úshin qýanysh desek te bolady. О́ıtkeni qazir – kúzdik soıyp alatyn ýaqyt. Erte qamdanǵandar soǵymdaryn saılap aldy.
Jylqy etiniń kılosy – 2 600 teńgeden, sıyr eti – 2 300 teńgeden, qoı eti – 2 200 teńgeden saýdalandy. Kartoptyń kılosy – 100, pııazdiki – 80, qyryqqabattiki – 130 teńge. Qampaıǵan sóre tal túske deıin bosap ta qaldy.
– Qarqaralydan kelgen jabaǵynyń jartysyn satyp aldym. Baǵasy qaltańa qonymdy. Bazardaǵydan ájeptáýir arzan. Ári jas mal. Kózińizben kórip, ustap, tańdap alýǵa múmkindik mol, deıdi ózin Beksultan dep tanystyrǵan qala turǵyny.
Saýdaǵa ákelingen 630 tonna ónimniń 64 tonnasy – et, 390 tonnasy – kartop, 130 tonnasy – kókónis, 21 tonnasy – sút ónimi, 8 tonnasy – balyq. Munyń syrtynda 190 myń dana taýyq jumyrtqasy men 14,5 tonna ózge de ónim bar.
Nura aýdany Qaroı aýylynan kelgen «Qoǵam» sharýa qojalyǵynyń jetekshisi Jambyl Mámbetov jármeńkege jylda belsene qatysady. Qoı-qozysyn saýdalaıdy. Bul joly 200 kılo qozy etin ákelipti. Túske deıin sóresinde bir qozy ǵana qalypty.
– Qoı-qozy etiniń ótimi jaqsy. Ákelgen taýarymdy ózimmen alyp qaıtqan kúnim bolmapty. Máselen, alyp kelgen 200 kılo etimnen 30-aq kılo qaldy. Sharýashylyǵym bar. Negizi baǵytymyz – qoı ósirý. Sharýalar úshin mundaı jármeńke óte tıimdi. Eshqandaı deldalsyz saýdalaı alamyz, deıdi J.Mámbetov.
Kartop ótkizip turǵan saýdager Súndet Hantórıevtiń túske deıin bir jarym tonna óniminiń jartysy saýdalanyp ketipti. «Bul kartop úıde ósirilgen. Eshbir hımıkatsyz, taza tabıǵı ónim. Onyń ústine baǵasy bazardaǵy kartoptan áldeqaıda tómen», deıdi S.Hantórıev.
Muny da aıta ketkenimiz jón, qalalyqtarǵa qolaıly bolýy úshin tórt baǵytta Maıqudyq, Prıshahtınsk, Mıhaılov jáne Ońtústik-Shyǵys boıynsha tegin arnaıy qoǵamdyq kólikter uıymdastyrylyp qoıǵan.
Jármeńke jalǵasyn tabady. Resmı oryndardyń málimdeýinshe, «Global City» aýmaǵynda kelesi jármeńkeler 28 qazan men 4 qarashaǵa josparlanǵan. Munymen qosa, qarasha-jeltoqsanda Qaraǵandyda «Global City», «Umaı» saýda úıiniń aýmaǵynda (Maıqudyq) jáne «Molodejnyı» mádenıet úıi (Prıshahtınsk) alańynda da ótkizý kózdelip otyr.
Alǵashqy jármeńkege kelgender kóp bolǵanymen, estimeı qalǵan el de bar. Aldaǵy jármeńkelerdiń jarnamasyn kúsheıtse, aýyl dámin ańsaǵan aǵaıyn qalys qalmasa degen oı bizdiki.
Qaraǵandy oblysy