Dástúrli án óneriniń kórnekti ókili Qazaqstannyń eńbek sińirgen qaıratkeri Jaqsygeldi Kemalovtyń «Aıboz ǵumyr asqaq án» atty shyǵarmashylyq keshi Kenshiler mádenıet saraıynda dúrkirep ótti. О́ner keshine qazaq ániniń abyzy Qaırat Baıbosynov bastaǵan nebir dúldúlder jınaldy.
Estýimiz bar, óner kóshinde júrgen aǵalar Jaqsygeldi Kemalovqa «muz jarǵysh keme» degen ataq beripti. Nege deseńiz, sekseninshi jyldary qazaqtyń klassıkalyq ánin jańa beleske shyǵarǵan daryndardyń biri – Jaqan seri. Ol Birjan sal, Aqan serilerdiń búgingi jalǵasy.
Sol Jaqań keshtiń shymyldyǵyn suńqar Sákenniń «Taý ishinde» ánimen túrdi. Sańlaq Sákenniń ánin áserli oryndaǵanda qadirmendi tyńdarman qaýym qoshemet qyldy. «Qyzyl asyq» shyrqalǵanda keń zaldyń ishin tipti, qıqý basty. Dombyra da sheber shertile tústi, ánshi de daýysyn jaıqalta áýeletti. Aqjarma tilektiń kóshin oblys ákiminiń orynbasary Baýyrjan Asanov bastady.
– Siz keshegi dalanyń qasıetin boıyna sińirgen kóshpendiniń rýhyn sharyqtatyp júrgen dara tulǵasyz. Bútin elge qurmettisiz. О́zindik mektep qalyptastyrǵan ustazsyz. Jasaı berińiz, – dedi Baýyrjan Qońyrbaıuly.
Keshke arnaıy kelgen Parlament Májilisiniń depýtattary Amanjol Áltaev pen Janarbek Áshimjan da jyly lebizderin bildirdi.
Kesh barysynda ánshige «Jańaarqa aýdanynyń Qurmetti azamaty» ataǵy tabystaldy.
– Jaqan aǵa, týǵan topyraǵyńyz sizben árqashan maqtanady. Keshegi serilerdiń, dúldúlderdiń jalǵasysyz. Osy ataqty tabystaý mártebesi maǵan buıyrdy. Aýyldaǵy eldiń yqylasyn, sálemin qabyl alyńyz, – dedi Jańaarqa aýdanynyń ákimi Qanat Qojyqaev.
Keshte Abaı atyndaǵy Memlekettik syılyqtyń laýreattary Serik Aqsuńqaruly men Ǵalym Jaılybaı lebizderin óleńmen jetkizdi.
Keshti kemeline keltire júrgizgen aqyn, fılologııa ǵylymdarynyń doktory, professor Qoılybaı Asanov:
– Mádenıet saraıynyń aldyńǵy qatarynda abyz aqsaqal Jaıyq Bekturov otyrýshy edi. Sol Jákeń aqsaqal Jaqsygeldini sahnadan túsirmeıtin. Kúsh-qýaty taıa bastaǵan álsiz qolyn qaıta-qaıta kóterip: «Áı, Jaqan, «Edil men Jaıyqty» shyrqashy» dep qońyr únimen qarlyǵa daýystaıtyn. Qońyr dombyra kúmbirlep sala beredi. Kóz aldyńyzǵa Jaıyqty jaǵalap kele jatqan Tólegenniń boz jorǵasy elesteıtin. Ásirese Jaqań ándi bastamas buryn dombyrasyn jorǵalata shertip, tyńdaýshynyń júregin eriksiz baýrap alatyn, – deıdi.
Ánshiniń shákirtteri shoqtyǵy bıik klassıkalyq ánderdi shyrqady. Keshiniń núktesin Táttimbet atyndaǵy akademııalyq qazaq halyq aspaptarynyń orkestri qoıdy.
Qaraǵandy oblysy