Energetıkalyq qaýipsizdikti qamtamasyz etý – basty mindetterdiń biri. Sol sebepti de energetıka salasyndaǵy jumysty jetildirý Memleket basshysynyń tikeleı nazaryndaǵy másele. Kúnnen qýat alatyn energııa kózderi boıynsha aımaǵymyz respýblıkadaǵy kóshbasshy óńirge aınaldy. Jaqynda Qaraǵandy oblysy taǵy bir «jasyl» nysanmen tolyqty. Balqash qalasynyń Qońyrat shaǵyn aýdanyna jaqyn ornalasqan ónerkásiptik alańda «SES 4,77 mvt» kún elektr stansasy iske qosyldy.
Iri jobanyń qurylysy naýryz aıynda bastalǵan. 10 gektar stansa aýmaǵyna 8850 kún sáýlesinen qýat alatyn panel ornatylǵan. Kún-elektr stansasy jylyna 4,77 megavatt elektr energııasyn óndirmek. О́ndiriletin elektr energııasyn tutyný arqyly kómir jaǵýdy 16-18 paıyzǵa azaıtý josparlanǵan.
Qýat óndirý ornyn salý jumystaryn otandyq qurylys kompanııasy atqarǵan. Qurylysqa 10-ǵa jýyq jumysker jumyldyrylǵan. Al qazir 2 adam turaqty jumys isteıdi.
Alty shaqyrymnan astam uńǵymalar burǵylandy. Salmaǵy 200 tonnadan asatyn 177 metall konstrýksııalar jıyntyǵy ornatyldy. 64 shaqyrymǵa sym men kábil tartyldy.
– Stansaǵa ornatylǵan eki jaqty panelder tikeleı kún sáýlesin de, jerden shaǵylysqan sáýlelerdi de paıdalanýǵa múmkindik beredi. Olardyń belgilengen qýat koeffısıenti joǵarylaıdy, bul paıdalaný tıimdiligin arttyrady. Kompanııamyz taza jáne turaqty energııaǵa umtylatyn basqa aımaqtarǵa úlgi bolýdy maqsat etedi. 2035 jylǵa qaraı Qazaqstanda JEK úlesi shamamen 15 paıyz bolady dep boljanyp otyr. Biz óz úlesimizdi osyǵan az da bolsyn qostyq. Jumysty ýaqytynda oryndaǵan burǵylaýshylar tobyna alǵysym sheksiz. Elektrıkter men BPP retteýshilerge merdigerlerdiń qatysýymen stansa jabdyqtaryn iske qosqany úshin rahmet aıtamyn. Bizdiń kompanııa usynatyn kún elektr stansasy – bul ınnovasııalyq tehnologııalar men ekologııalyq taza energııa kózderin qurýǵa degen kúsh-jigerimizdiń kórinisi, – deıdi «Koýnrad mys kompanııasy» JShS tehnıkalyq dırektory Vıtalıı Logachev.
Munymen qosa, «SES 4,77 mvt» kún elektr stansasynyń ashylýyna qatysqan Balqash qalasynyń ákimi Sapar Sataev, qalalyq máslıhat tóraǵasy Ahat Múslimov, oblystyq ekologııa departamentiniń bastyǵy Darhan Erǵalıuly jáne tapsyrys berýshi kompanııanyń departament basshylary quttyqtaýlaryn jetkizdi.
– Memleket basshysy Qasym-Jomart Toqaev 2021-2025 jyldarǵa arnalǵan «Jasyl Qazaqstan» ulttyq jobasyn ázirleýge bastamashy bola otyryp, ekonomıkany jasyldandyrý men qorshaǵan ortany qorǵaýdy ekonomıkalyq baǵyttyń negizgi baǵyttarynyń biri dep atady. Elimizdiń óńirlerinde kómirqyshqyl gazynyń bólinýin shekteý jáne ósip kele jatqan shóleıttenýdi aýyzdyqtaý úshin Memleket basshysy bes jyl ishinde ormandarǵa 2 mıllıardtan astam aǵash otyrǵyzý jáne eldi mekenderde 15 mıllıonnan astam aǵash otyrǵyzý mindetin alǵa qoıyp otyr. Mine, jańa kún elektr stansasy ashylyp otyr. Men balqashtyqtardyń atynan alǵys bildiremin. Halyqtyń únemi ósip kele jatqan qajettilikterin qanaǵattandyrý úshin qorshaǵan ortany qorǵaı otyryp, qansha óndirý kerek, qalaı óndirý kerek, kimge óndirý kerek degen máselelerge úlken mán beretin kez keldi. Biz mundaı bastamalardy qoldaýǵa ázirmiz. Jańa nysannyń jumysyna sáttilik tileımin, – dedi Balqash qalasynyń ákimi Sapar Sataev.
Buǵan deıin de Balqashta qýattylyǵy 40 MVT bolatyn «Gúlshat» kún elektr stansasy iske qosylǵan edi. Quny 46 mıllıon dollardy quraıtyn joba búginde el ıgiligine aınalyp otyr. Jańa elektr stansasynyń da paıdasy orasan bolmaq.
Qaraǵandy oblysy,
Balqash qalasy