Qudaı betin ári qylsyn deıik, degenmen keıingi kezderi dala órti jıilep ketti. Memleket basshysy Úkimetke dala órtiniń aldyn alý boıynsha birqatar mindetter júktegen edi. Osy oraıda jer kólemi aýqymdy Shet aýdanynan taǵy bir órt sóndirý stansasy ashyldy.
Jasyratyny joq, órt sóndirý stansasy munda erteden kerek edi. Sáti bıyl túsip, Aqsý-Aıýly aýylynan Balqashqa qaraı shyǵaberis joldyń boıynan birinshi tıpti modýldik stansa ashyldy.
Nysannyń ashylý saltanatynda oblystyq tabıǵı resýrstar jáne tabıǵatty paıdalanýdy retteý basqarmasynyń basshysy Baqtııar Sanbaev, Shet aýdany ákiminiń orynbasary Dáýren Kársenbaev, orman sharýashylyǵynda uzaq jyldar eńbek etken ardager Qazybek Seıitjanuly, Aqsý-Aıýly aýylynyń turǵyny, ardager Amantaı Rashıtov quttyqtaýlaryn jetkizdi.
– Prezıdentimiz Qasym-Jomart Toqaev Úkimetke orman, dala órtteriniń aldyn alýǵa qatysty birqatar mindetter júktegen bolatyn. Osyǵan sáıkes qarjy bólinip, elimizdiń ár óńirinde jumystar qolǵa alyna bastady. Bul biz úshin óte qajet. Tozyǵy jetken tehnıkalar men órt sóndirý beketterin jańartý jaıy da nazardan tys qalmaq emes. Atalǵan orman órt sóndirý stansasy talapqa saı, órtke qarsy qajetti qural-jabdyqtarmen qatar, kıimder jáne arnaıy tehnıkalarmen qamtylǵan, sondaı-aq shtattyq birlikter qarastyrylǵan, – deıdi Dáýren Kársenbaev.
Rasymen, modýldik orman órt sóndirý stansasy zamanaýı talaptarǵa saı jabdyqtalǵan. О́rt sóndirý kólikteri qyzmetke ázir. Dabyl qaǵylǵan sátten bastap nebári 1 mınýt ishinde jolǵa shyǵady. Munymen qosa, qyzmetkerlerge arnaıy jatyn bólmeler de qarastyrylǵan. Sportzal, ashana men kásibı daıyndyq jasaý oryndary da bar.
Qaraǵandy oblysy,
Shet aýdany