Shet aýdany, Joǵary Qaıraqtyǵa qarasty Maıbas qystaǵynda Araılym esimdi kelinshek traktor tizgindep, shóp shabady. Onymen qosa, úıindegi sharýasyn da shashaý shyǵarmaı ózi atqarady. Kúndelikti tamaǵy, saýatyn sıyr-bıesi bar, tartatyn súti, shaıqaıtyn maıy, jaıatyn qurty bar degendeı...
Kúndelikti osynaý tirlikti shańyraqtyń kelisti kelini Araılym atqarady. Bizdiń tań qalǵanymyz mynaý: arasynda ýaqyt taýyp, jary Daryn Iztileýulyna qolǵabys etedi. Qasynda júrip, jumsaǵanǵa jarap tursa, asa tańyrqamas edik. Al Araılym ózderine tıesili shaǵyn sharýashylyqtyń úlken jumysyn júıelep otyr. Jaz boıy kók traktordy minip alyp, shóp shabady. Ony jınaıdy. Qysta qymtanyp alyp, mal jaıǵaýǵa shyǵady.
Mundaı qystaqtyń qara jumysyna barǵan sebebi mynada eken. Kúıeýi Daryn – úıiniń jalǵyz uly, ıaǵnı qarashańyraqtyń ıesi.
«Osynyń bárin túısingen soń, sanaly túrde, ózim ótinish jasadym. Áıtpese, sharýashylyqqa jalǵyz ózi úlgermeı jatady. Bir jaǵynan óristegi maldy qaraý kerek, onymen qosa, shóp naýqany bar. Sodan maǵan «Aýdı» kóliginen bastap, motosıkl, traktor júrgizýdi úıretti», deıdi traktorshy kelinshek.
Alǵashynda Araılym motosıklmen qyrda júrgen kúıeýine kóje-qatyq aparyp turǵan. Mal qaıyrysady. Úıdegi tirlikke qaraılasady. Qysqasy, tynym joq.
Al Daryn qazir kelinshegine ábden senip alǵan. Traktoryn, kóligin jóndese Araılymsyz attap baspaıdy-mys. Nege deseńiz, jas kelin kilt-saımannyń bárin jattap alypty. Endigi maqsaty da mynaý: jóndep úırenip alsam, alańsyz qyrda shóp shaba beretin.
Araılymnyń qystaqqa kelin bolamyn degeni úsh uıyqtasa, túsine kirmepti. «Bolashaq» kolledjin támamdaǵan soń, Jyljymaıtyn múlik ortalyǵyna jumysqa turady. Sol kezde osyndaı qystaqtardy aralap, úıdiń, jerdiń, bazdyń ólshemin jasaıdy eken. Sondaǵy bastyǵy Araılymǵa ázildep «Erteń osyndaı qystaqqa kelin bolasyń», deıdi eken. Al Araılym bolsa, «Alla saqtasyn» dep, at-tonyn ala qashqan kórinedi.
Bastyǵynyń aıtqanyn Alla qabyl etip jiberedi de, kóp uzamaı qystaqtyń qara domalaq kelini bolyp shyǵa keledi.
«Enemniń mektebi ǵoı», deıdi ózi. Aýylda óskenimen, sıyr-bıe saýa almaǵan kórinedi. Mal saýa almaǵan soń, belgili sút tartyp, irimshik qaınatýǵa da jattyǵy bary. Biraq Araılym munyń bárin bir kórsetkennen-aq qaǵyp alady. Qazir qystaqta otyryp-aq, qymyz-qurtyn, maı-qaımaǵyn Astana men Almatydaǵy tutynýshylaryna jóneltedi.
Shaǵyn sharýalyqtarynda 50 qazaqy sıyr, bir úıir jylqysy bar. Memleket tarapynan qoldaýǵa júgine qoımapty. Tek, jańa traktor alǵylary kelipti, alaıda kepildik bolmaǵan soń, oǵan qol jetkize almapty. Endigi oı-murattary – ekeýlep eńbek otyrǵan soń, sharýashylyqty ármen qaraı úlkeıtý, óristi malǵa toltyrý.
Eńbek kórip ósip kele jatqan úsh ulynyń da yńǵaıy sharýashylyqqa keledi eken. Kúni erteń olar da myńǵyrǵan qoı, úıir-úıir jylqy, tabyn-tabyn sıyr aıdasa, tańyrqamaımyz.
«Kelinshegimmen tanysqanymyzǵa úsh aı ýaqyt ótken soń, otbasyn qurdyq. Jar tańdaýdan qatelespeppin. Úıdegi jalǵyz ul bolǵan soń, búkil júk maǵan túsetin edi. Qazir sol júgim jeńildedi. Jarym Araılym ózi maǵan jany ashyp, kómekteskisi keldi. Barlyǵyn tez úırenip alǵanyna ózim de tańmyn. Qysy-jazy dalanyń sharýashylyǵy bitpeıdi ǵoı. Buryn maldan syrtqa múldem shyǵa almaıtynmyn. Qazir kelinshegime tapsyryp, alańsyz kete beremin. Osyndaı adal jan jolyqqan men shynymenen baqyttymyn», – deıdi joldasy Daryn.
– «Maı-maı bolyp traktor júrgizgeni nesi?», dep sóz qylǵandar tabyldy. Biraq naǵyz adal eńbek, mańdaı ter osy dep oılaımyn. Kúni erteń úsh ulymyz ósken soń, sharýamyz dóńgelep ketedi dep senemiz. Al oǵan deıin kúıeýimiz ekeýmiz eńbek ete beremiz, – deıdi traktorshy kelinshek.
Qaraǵandy oblysy,
Shet aýdany