Memlekettik syılyqtyń laýreaty, Qazaqstannyń eńbek sińirgen ártisi Keńes Jumabekov 75 jasyn sahna tórinde qarsy aldy. Sáken teatrynda belorýs dramatýrgi Alekseı Dýdaraevtyń «Kesh» qoıylymyn sahnalady.
Bul qoıylymnyń ózgesheligi sol, bas-aıaǵy úsh keıipker somdaıdy. Úsheýi de – teatr óneriniń iri ókilderi. Basty rólde – Keńes Jumabekov. Qazaqstannyń eńbek sińirgen qaıratkeri, «Kereı han» atalyp ketken Qaırat Kemalov pen daryndy aktrısa Nurjibek Jansúgirova – sahnada. Osy bir mezette premeraǵa kelgender demin ishke tartty.
Spektakl soǵys soıqanynan keıin shalǵaıdaǵy aýylda qalǵan úsh qarııanyń ómirin baıandaıdy. Úsheýi de taǵdyrdyń túrli taýqymetin tartyp-aq baqqan. Ashtyqty da, soǵysty da kórgen. Eń soraqysy sol, úsheýi de balalaryna kereksiz bolyp qalǵan. Izdep qalar degen jalǵan úmitpen kúni boıy jolǵa jáýteńdeıdi. Alaıda, joq...
Vasılıı aqsaqal (Keńes Jumabekov) «Balam álgi geolog deı me, birdeme bolyp jumys isteıdi. Jerdiń ústinde ákesi júrgende, astyndaǵy baılyqty nemenesine izdeıdi?», dep kúıingen kezde kórermen tańdaı qaqty.
Qysqasy, keıipkerler jaryq álemniń mahabbat muńy, saǵynysh sheri, tasbaýyrlyq taýqymeti jóninde oı qozǵaıdy.
– Bul – taǵdyry tragedııaǵa aınalǵan beıbaqtar týraly spektakl. Balalaryna kereksiz bolyp qalǵan qarııalardyń muń-zaryn kóremiz. Qazir qaraýsyz qalǵan qarııalar kóp. Qarttar úıine baryńyz. Júregińiz aýyrady. Jastar osy qoıylymnan taǵylym alsa degen tilegim bar. Analar, ákeler jylamasyn. Myna spektakl joǵary deńgeıde ótti. Jaqsy áser aldym. Akterler osy qoıylymdy júrekpen, ystyq sezimmen oınady, – deıdi Qazaqstannyń eńbek sińirgen qaıratkeri Bolat Uzaqov.
О́z kezeginde kesh ıesi de kórermenderimen qaýyshqanyna rıza bolyp, alǵys jaýdyryp, bas ıdi.
«Mereıtoıyma osyndaı syı jasap jatyr. Qýanyshymda kórermenimmen qaýyshqanyma razymyn. Barshańyzǵa alǵysym sheksiz. Shamamyz jetkenshe qasıetti ónerge adal bolýǵa tyrysamyn», dedi Keńes Jumabekov.
Qaraǵandy oblysy