Memleket basshysy Qasym-Jomart Toqaev elimizdiń saılaý júıesin jetildirýge erekshe den qoıdy. Osy saıası reforma aıasynda bıyl Qaraǵandy oblysynda eki aýdan, bir qalada saılanǵan jańa ákimder jaýapty qyzmetine kiristi. Alash arystarynyń altyn besigi Aqtoǵaı óńirine issaparmenen jol túsip, mundaǵy halyq tańdaýy túsken ákim Rýslan Kenjebekovpen jolyǵyp, saılaýaldy baǵdarlamasyndaǵy aýdannyń ekonomıkalyq áleýeti jóninde áńgime órbitkenbiz.
Aqtoǵaı aýdanyna aparar joldyń buǵan deıin syny birshama ketken bolatyn. Osy joly aýdan ortalyǵyna deıingi shamamen jarty joldy asfalttap qoıypty. Alǵashqyda taǵaıyndalǵan Rýslan Aıtkenuly qyzmetine kirise sala, tozyǵy jetken tasjoldyń jóndeý jumystaryna kúsh salypty. Jańa ákimniń saılaýaldy baǵdarlamasynda da alǵashqy máselelerdiń tiziminde kósh bastap tur eken. Keler jyly bul jumysty Aqsý-Aıýly aýlyna deıin jetkizemiz dep otyr.
Aqtoǵaıdaǵy shalǵaı aýyldarda aýyz sý máselesi áli de ózekti. 2025 jylǵa deıin barlyq eldi mekendi ortalyqtandyrylǵan aýyz sý júıesimen qamtýdy josparlap otyr. Búgingi kúni shaǵyn aýyldarǵa sý tartylý jumystary júrýde.
«Bıyl Qýanysh (409 mln) jáne Úsharal aýyldaryna (312 mln) sý tartyldy. Al 364 mln teńge qarjy qarastyrylǵan Jalańash aýlyna sý tartý jumystary kelesi jyly aıaqtalmaq. Bul jumystarǵa oblystan da, respýblıkadan da qarjy bólingen. Keler jyly 343,6 mln teńge bólinip otyr. Aqtoǵaı 4 kezek, Qarasý, Aqjaıdaq eldi mekenderine sý tartamyz. Jobany iske asyrýǵa qujattar tolyǵymen ázirlengen», deıdi Rýslan Aıtkenuly.
Bıyl Shashýbaı kentindegi 100 páterlik úıdi qalpyna keltirý jumystary aıaqtalyp qalypty. Aqtoǵaı aýlynda jeke ınvestısııalar esebinen salynǵan 10 páter quny 150 mln-ǵa satyp alyndy. Páter kezegin tómendetý úshin osy baǵyttaǵy jumystar jalǵasatynyn aıtty jańa ákim.
«Aýdan boıynsha turaqty elektr jaryǵymen qamtamasyz etý de – mańyzdy másele. Nysandardy «JezREK» AQ ıeligine ótkizý úshin kelissózder júrgizilip, arnaıy jol kartasy ázirlendi. Jol kartasyna sáıkes «JezREK» AQ-ǵa qujattar tapsyryldy. Búgingi kúni nysandardy kútip ustaý, turǵyndardy úzdiksiz elektr qýatymen qamtamasyz etý maqsatynda arnaıy jumys toby qurylyp, «JezREK» AQ mamandarymen birlese otyryp elektr jelilerin túgendeý jáne qujattaryn sáıkestendirý jumystary júrgizilip jatyr. Qujattardy retteý, ózgeris engizý boıynsha tıisti is-sharalar atqarylyp keledi», deıdi ákim. Demek jel úp etse, jalp etip sónetin jaryqtyń sapasy artatynyna úmit bar.
Sonymen qatar aýdan basshysy bıyl Qyzylaraı aýlynda feldsherlik-ambýlatorııa qurylysy bastalsa, kelesi jyly osyndaı FAP Aıyrtas, Qýsaq, Aqjaıdaq, Ortaderesin, Qýanysh, Aqtas, Úsharal, Kejek, Núrken aýyldarynan salynatynyn jetkizdi.
Saryshaǵan kentindegi mektep-ınternatqa jáne «Aıgólek» balabaqshasyna, Shashýbaı kentindegi mektep-balabaqsha keshenine, Q.Nurjanov atyndaǵy mektepke, Á.Ermekov atyndaǵy mektepke kúrdeli jóndeý jumystary josparlanyp otyr. Keler jyly «Qazaqstan halqyna» qory arqyly Shashýbaı kentinde shamamen 250 mln teńgeni quraıtyn deneshynyqtyrý-saýyqtyrý kesheni salynbaqshy.
«Aýdanǵa ınvestısııa tartý, taý-ken óndirisin damytý baǵytynda aýqymdy sharalar atqarylǵaly tur. Byltyr bastaý alǵan «Irkaz Metall Korporasııasy» JShS «Borly» ken ornynda katodty mys óndiretin gıdrometallýrgııalyq zaýyttyń qurylysy 9,0 mlrd teńgege iske qosylyp, 125 adam jumyspen qamtyldy. Bıyl «Balqash Resources» JShS «Qaratas 2» ken ornynda 4,3 mlrd teńgeniń temir jáne tústi metall óńdeý óndiristik ken-baıytý kesheni qurylys jumystaryn bastady, joba tolyq kúshine 2025 jyly enedi. 303 jańa jumys orny ashylyp qalar dep kútip otyrmyz. «SAQ-NS» óndiristik kooperatıvinde zamanaýı nemis tehnologııasy boıynsha qymyz óndirý sehy salyndy. О́nimdiligi táýligine 1200 lıtr. Joba quny 82 mln teńgeni quraıdy. «SAQ-NS» óndiristik kooperatıvi táýligine 5 tonna et óndiretin modýldi mal soıý sehyn ashpaqshy. Jartylaı fabrıkatty et ónimderin shyǵarady. «Qazaq steppe sheep» JShS 9 myń mal ósiretin mega-ferma quryp, jylyna 420 tonnaǵa deıin usaq maldyń etin óńdeýge arnalǵan et kombınatyn salý josparda bar. Al «Global Beef Products» JShS 2 myń asyl tuqymdy angýs iri qara malyn ósirip jatyr. Osyndaı, iri jobalar aýdanymyzdyń ekonomıkalyq ósimin arttyrady», deıdi ákim.
Igerilmeı jatqan jaıylymdyq jáne shabyndyq jerlerdi memleket menshigine qaıtarý máselesi de belsendi júrgizilip jatyr. Aýdan boıynsha bıyl 192,9 myń gektar aýyl sharýashylyǵy jerleri qaıtaryldy. Jerlerin paıdalanbaı otyrǵan 18 sharýa qojalyǵy, ıaǵnı 73212 gektar jer telimine monıtorıng júrgizilip, oblystyq jer resýrstaryn basqarý departamentine tekseris júrgizý úshin joldandy. Saılanǵan ákimniń saılaýaldy baǵdarlamasyndaǵy negizgi máseleler reti osyndaı.
«Memleket basshysynyń tapsyrmasymen alǵash ret qanatqaqty rejimde ótken aýdan men qala ákimderiniń saılaýynda alǵashqylardyń biri bolyp Aqtoǵaı aýdanynyń tizginin ustadym. Aýdan turǵyndary maǵan zor senim bildirdi. Shyn máninde, el senimin esh nársemen ólsheý múmkin emes. Halyqtyń senimi – eń qundy paryz. Jerlesterimniń qoldaýymen el tizginin ustaý – eń bıik mártebe», dep áńgimesin túıindedi R.Kenjebekov.
Qaraǵandy oblysy,
Aqtoǵaı aýdany