Májilis depýtattarynyń jumys sapary Qaraǵandy oblysynda jalǵasyp jatyr. Sapar barysynda saılaýshylarmen birqatar kezdesý, sondaı-aq ónerkásiptik jáne áleýmettik nysandarǵa barý josparlanǵan.
Keshe májilismender A.Qalyqov, Ú.Shapaq, B.Smaǵulov, T.Adambekov jáne N.Shatalov №2 О́ndiris «Qurylysmet» JShS (NOMM zaýyty) ujymymen kezdesti. Kásiporyn shahta jabdyqtaryn, elektr dánekerlengen bolat qubyrlardy shyǵarady. Kásiporyn qyzmetkerleriniń sany 500 adamnan asady.
Kezdesýdiń negizgi maqsaty – Memleket basshysynyń reformalaryn oryndaý boıynsha aqparattyq jumys, sondaı-aq «Amanat» partııasynyń saılaýaldy baǵdarlamasynyń Jol kartasynyń pýnktterin oryndalýyn iske asyrý.
Kezdesýde tazartý qurylystaryn jańartý, óndiristi jańǵyrtý, kásiporyndaǵy eskirgen jabdyqtardy jańartý, jumysshy mamandyqtarynyń mártebesin arttyrý jáne áleýmettik máseleler kóterildi.
Máselen, kezdesý barysynda Shahtınsk qalalyq máslıhatynyń depýtaty Maqsat Toqanov qaladaǵy tazartý qurylystary boıynsha birqatar másele bar ekenin aıtyp: «Qazirgi kezdegi qurylymdar eskirgen jáne endi paıdalanýǵa jaramsyz. Sizden respýblıkalyq qoldaý suraımyz», dedi.
«Bul másele tek sizdiń aımaǵyńyzda emes, Aqtoǵaı aýdany men Balqash qalasyndaǵy Saryshaǵan qalasynda da bar. Búgingi tańda jaýapty oryndaýshy jańǵyrtý josparyna sáıkes aldyn ala TQK júrgizdi, JSQ ázirlendi, 1,2 mlrd teńge kóleminde bıýdjet bólindi. Suraǵyńyzdy baqylaýǵa alyp, máseleniń sheshimin tabýyn sońyna deıin qadaǵalaımyz», dep sendirdi depýtat Baýyrjan Smaǵulov.
Májilismender betpe-bet áńgime barysynda qoıylǵan barlyq suraqqa jaýap berýge tyrysty. О́z kezeginde kásiporyn qyzmetkerleri keri baılanys úshin alǵystaryn bildirip, aldyńǵy kezdesýlerde kóterilgen máseleler men ózekti suraqtardy esine aldy. Oń sheshilgen suraqtar da bar, mysaly, sol kezde kóterilgen avtoparkti jańartý jáne marshrýttardy ulǵaıtý máselesi tolyq qolǵa alynǵan.
Qaraǵandy oblysy