Almatyda tanymal memleket jáne qoǵam qaıratkeri Zamanbek Nurqadilovti eske alýǵa arnalǵan taǵylymdy is-shara ótti. Táýelsiz elimizdiń tarıhynda irgeli isterimen aıshyqtalǵan aıtýly azamattyń týǵanyna bıyl 80 jyl tolyp otyr. Rýhanııat janashyrlary, qoǵam qaıratkerleri men belgili saıasatkerler bas qosqan taǵzym is-sharasynda kórnekti tulǵanyń ómir belesteri, qaıratkerlik qyry haqynda ózekti oılar aıtyldy.
Táýelsizdiktiń eleń-alańynda eldiń jaýapty azamattarymen birge memleket irgetasyn qalasqan Zamanbek Qalabaıuly Almaty qalasy men oblysynyń basshysy, Tótenshe jaǵdaılar mınıstri sekildi mańyzdy mindetterdi atqara júrip, kóptegen túıtkildi máseleniń túıinin tarqatýǵa sebepshi boldy. Onyń bastamasymen júzege asqan aýqymdy jumystardy aımaq turǵyndary áli kúnge deıin aıtady. Bul jóninde Memleket basshysy Qasym-Jomart Toqaevtyń arnaıy joldaǵan hatynda da aıtyldy. El basshysynyń júrekjardy pikirin Prezıdenttiń keńesshisi – Baspasóz hatshysy Berik Ýálı oqyp berdi.
«Bıyl belgili memleket jáne qoǵam qaıratkeri Zamanbek Nurqadilovtiń týǵanyna 80 jyl toldy. Táýelsiz Qazaqstan tarıhynda el múddesi úshin aıanbaı eńbek etken azamattar az emes. Zamanbek Qalabaıuly – osyndaı tuǵyrly tulǵalardyń biri. Ol egemendiktiń alǵashqy kezeńinde kóptegen jaýapty qyzmetti abyroımen atqardy. Memleketimizdi nyǵaıtýǵa aıryqsha atsalysyp, óńirlerdi órkendetýge zor úles qosqany daýsyz.
Ult perzentiniń esimin el jadynda jańǵyrtyp, eńbegine laıyqty baǵa berý – urpaq paryzy. Osy oraıda Zákeńniń týǵan jeri – Almaty oblysynyń Kegen aýdanynda oǵan eskertkish ornatý jáne Almatydaǵy turǵan úıine eskertkish-taqta ashý qajet dep sanaımyn. «Tarıh – tarazy» dep beker aıtylmaǵan. Halqymyzdyń kesek tulǵaly azamatynyń elge sińgen eńbegi eshqashan umytylmaıdy», delingen Prezıdenttiń hatynda.
Sondaı-aq Parlament Senatynyń tóraǵasy Máýlen Áshimbaev pen Májilis tóraǵasy Erlan Qoshanovtyń barsha depýtattar atynan joldaǵan resmı hattary jınalǵan qaýymnyń aldynda oqyldy.
Qazaqtyń tuńǵysh ǵaryshkeri Toqtar Áýbákirov bastaǵan qoǵam qaıratkerleri men zııaly qaýym eren tulǵanyń esimin urpaq jadynda jańǵyrtý – jaýapty mindet, bul baǵyttaǵy jumystar úzdiksiz jalǵasa berýi qajet dep esepteıdi.
Eńbek eri Asanáli Áshimov: «Zamanbek halyqtyń súıispenshiligine bólengen, adal, batyr tulǵaly azamat edi. Ony halyq shyn máninde jaqsy kórdi. Jaqsynyń aty esh ýaqytta umytylmaıdy, elimen birge jasaı beredi», dep eske aldy. Al qoǵam qaıratkeri Murat Áýezov: «Zamanbek – saıası qaıratker ǵana emes, rýhanııat janashyry. Onyń kóńildiń keıbir sátterinde óleń jazatyny, aýdarmamen aınalysatyny bar edi. Bul da tazalyqtyń belgisi bolsa kerek. Qalaı degende de, ol tarıhtan, el júreginen oıyp oryn aldy», dep azamattyń asyl qasıetin atap ótti.
Bederli jyldar belesinde el damýyna eleýli úles qosqan tulǵanyń kásibı biligi, jan dúnıesiniń tazalyǵy, kisilik kelbeti jaıly da estelikterde aıtyldy.
«Zamanbek – ultyn rııasyz súıgen adam. Basshylyq qyzmette júrgen kezeńderinde talaı jurtqa sharapaty tıdi. Kezi kelgende batyl sheshimderge baryp, tarshylyq kórgen azamattardyń baspanamen qamtylýyna, jer telimderine ıe bolýyna kóp yqpal etti. Qandaı batyl bolsa, sondaı kishipeıil edi. Aldyna kelgen qarapaıym adamnyń ózin qabyldap, onyń máselesin sheshýge jan-tánimen kirisetin. Keńes zamanynyń sońǵy kezi men egemendiktiń alǵashqy jyldary Almatyny basqarý ońaı emes edi. Biraq Zákeń osynaý jaýapty mindetti abyroımen atqardy», dedi qoǵam qaıratkeri Amangeldi Ermegııaev.
О́z kezeginde Nurlan Orazalın, Beksultan Nurjekeuly, Amangeldi Shabdarbaev, Amandyq Batalov, Serik Úmbetov, Zeınep Ahmetova, Rysbek Sársenbaıuly, Bolat Ábilov qaıratker jaıly jarqyn estelikterimen bólisti.
ALMATY