Endi elimizde densaýlyǵyna baılanysty demalys paraǵy tek elektrondy túrde beriledi. Densaýlyq saqtaý mınıstrligi eńbekke jaramsyzdyq qaǵazyn alý úshin emhanaǵa kelýdiń qajeti joq ekenin aıtty, dep jazady Egemen.kz.
Eńbekke jaramsyzdyq paraǵyn ashý-jabý prosesi elektrondy túrde júrgiziledi. Qyzmetkerge qaǵazdy tasyp, jumys berýshige qol qoıýdyń qajeti joq.
«Bıyl qaǵaz túrindegi eńbekke jaramsyzdyq paraǵyn tolyǵymen alyp tastadyq. Eńbekke jaramsyzdyq paraǵyn ashý týraly faktiler de azamattyń kelisimimen jumys berýshige elektrondy túrde beriledi. Eger buryn eńbekke jaramsyzdyq paraǵy qyzmetker jumysqa kelgen kezde ákelinetin bolsa, endi biz eńbekke jaramsyzdyq paraǵy ashylǵan nemese uzartylǵan sátte habarlaımyz», dedi Densaýlyq saqtaý vıse-mınıstri Beıbit Esenbaev.
Bul qyzmetti eDensaulyq qyzmetinen jáne eGov.kz mobıldi qosymshasynan tabýǵa bolady.