Qaraǵandydaǵy ózge etnos ókilderi de Ulystyń uly kúnin jatsynbaıdy, qýana qarsy alady. Naýryznamanyń onkúndigi bastalǵaly beri kóbi túrli is-sharada tóbe kórsetip júr. Solardyń qataryndaǵy Temirtaý qalasy isker áıelder qaýymdastyǵynyń tóraǵasy Natalıa Arystanova týraly erekshe aıtýǵa bolady. Qazaqqa kelin bolyp túsken Natalıa baýyrsaqty da, naýryzkójeni de enesi úıretken mázirimen ózi daıyndaıdy.
Qazaqy dástúr-ǵurypty boıyna sińirip alǵan Natalıany Temirtaý qalasynyń jurtshylyǵy jaqsy tanıdy. Natasha alǵashqyda qaladaǵy «Bıdaı-Nan» kásiporny dúkenderinde satýshy bolyp, 2005 jyly jeke kásipkerlikke den qoıdy. Oǵan deıin Qytaı men eki ortada san qatynap, taýar tasydy. Qazaq tilin erkin bilgeni kádege jarap, Astanadaǵy L.Gýmılev atyndaǵy ýnıversıtettiń ekonomıka fakýltetin de syrttaı oqyp bitirdi. Bilimi men tájirıbesi tolysqan ol ulttyq úlgidegi tósek-oryn jabdyqtaryn tigetin seh ashyp, búginde 15 adamdy jumyspen qamtyp otyr.
Natasha úshin Naýryz meıramynyń orny erekshe. Asyǵa kútedi. Nege deseńiz, byltyr «Damý» baǵdarlamasymen alǵan nesıesine «Arna» dúkenin ashty. Dúkenniń ashylýyn da Naýryz merekesine oraı uıymdastyrǵan kórinedi. Kópqabatty úıdiń birinshi qabatyn tutas alyp jatqan bul saýda núktesinde 25 adam nápaqasyn taýyp otyr. Til bilmegenderdi tutynýshylarmen qazaqsha sóılesýge ózi úıretip júr.
«Byltyr kóp jyldan beri armandaǵan «Arna» atty dúkenimizdi Naýryz merekesine oraı ashtyq. Esik aldyna ústelder qoıyp, qala jurtshylyǵyna ystyq palaý men shaı, tátti-dámdilerdi tegin usyndyq. Berekeli as – naýryzkójeni de tarattyq. Jalpy, ózim yrymshylmyn. Byltyrǵy Naýryz osyndaı jaqsylyǵymen, berekesimen keldi. Bıyl da otbasymyzben, qyzmetkerlerimizben jaqsylap atap ótemiz. О́ıtkeni bul merekeniń berekesi mol. Jyldy molshylyqpen bastasań, ári qaraı da ár kúniń toq bolady degen ishki túısigimde oı bar», deıdi kásipker kelinshek.
Natasha únemi qaıyrymdylyq aksııalaryna qatysady. Jomarttyǵymen úlgi. Mysaly, jylda «Mektepke jol» aksııasyna atsalysyp, qaladaǵy Qarttar úıi men Daǵdarys ortalyǵynan qoldan kelgen kómegin aıamaıdy. Oǵan qosa byltyr qysta sýyqtan tońǵan temirtaýlyq 60 otbasyǵa jyly kıim taratyp bergeni bar. Tipti bir kezderi ózimen birge satýshy bolyp istegen orystyń jetim qyzy Krıstınany joldasy Nurlybek ekeýi toı jasap, qoldan uzatqanyn da adamgershiliktiń úlken úlgisine jatqyzýǵa bolady.
Qazaqtyń salt-dástúrine jetik Natalıany temirtaýlyqtar qurmettep, sábılerin qyrqynan shyǵartyp, besikke salǵyzyp, tusaýyn kestiredi eken. Byltyr orys jigitine turmysqa shyqqan qurbysy Gúljanattyń sábıi Davıdke de osyndaı joralǵy jasaǵan. Osy ýaqytqa deıin 24 ul balany qyrqynan shyǵarypty. Qyrqynan shyǵarýdyń jón-joralǵysyn keıbir zamandastarynyń áli bilmeıtinine qynjylatynyn da aıtyp qaldy.
Joldasy Nurlybek ekeýiniń Laýra men Jangeldi esimdi ul-qyzy bar. Týǵanynan besikke bólep ósirgen. «Besikke bóleý – naǵyz tazalyq qoı. Shúkir, odan balalarym kem bolǵan joq», deıdi keıipkerimizdiń ózi. Ras, eki balasy da joǵary bilimdi, IT salasynyń bilikti mamandary. Qyzdary Laýra Astana qalasyndaǵy osyndaı kásiporynnyń bas dırektory bolsa, Jangeldi IT ýnıversıtetiniń magıstratýrasynda oqıdy. Al otaǵasy Nurlybek «Alaýtransgazdyń» apattan qutqarý qyzmetinde jumys istep, qazir qalaǵa gaz tartý máselelerimen shuǵyldanyp júr. Bul sharýaǵa elimizdiń túkpir-túkpirinen, ásirese ózderiniń týǵan jeri Aqtóbeden tájirıbeli mamandar aǵylyp kelip jatyr. Olarǵa qonaqjaı Arystanovtardyń esigi qashanda ashyq. Alystan at arytqan meımandar Natalıanyń ózi aınaldyryp, tuzdaǵan qazy-qartasyn súısine jep, qaımaq qatqan kúreń shaıyn qanyp iship, óz úılerine júrgendeı bolady. Árıne, munyń bári qazaqtyń kelisti kelini bolǵan Natashanyń keń peıilinen.
Joldasy Nurlybek jas kelindi Aqtóbedegi Shalqarǵa alyp barǵanda ata-enesi Orynbasar men Aldan jatyrqamaı, jatsynbaı baýyryna basyp, aq oramalyn taǵyp, dúrildetip toı jasap beredi. Sodan aýylda turyp, eneniń mektebinen ótedi. «Qazir enemniń eń súıikti kelinimin», dep marqaıady ózi. Atasynyń atyn aıtýǵa kelgende qysylyp, áreń degende baryp, «zamestıteldiń aýdarmasy ǵoı» degende biz «úlkendi syılaǵan izetińiz qandaı» dep tańyrqap qaldyq.
Natashanyń bıylǵy Naýryz merekesine daıyndyǵy qyzý. Úlken dastarqan jaıyp, ulttyq kıim kıip úıinde, dúkeni men tigin sehynda da atap ótedi. Naýryzkójeni ózi úıinen daıyndaıdy. Muny da enesinen úırengen. Jumysyndaǵylar Natashanyń ázirlegen baýyrsaǵyn, kójesin súısinip jep alady. Qazir kásipker kelinshek merekedegi dastarqannyń qamymen júgirip júr.
Qaraǵandy oblysy